नालासोपाऱ्यात ‘दृश्यम’ : प्रियकराच्या मदतीने पत्नीने केली पतीची हत्या आणि घरातच गाडला मृतदेह; अखेर हत्येचा उलगडा, पोलिसांकडून दोन्ही आरोपींचा शोध सुरु
योगेश पांडे / वार्ताहर
नालासोपारा – अजय देवगनची मुख्य भूमिका असलेला दृश्यम हा हिंदी चित्रपट सर्वांच्याच लक्षात आहे. त्यामध्ये अजय कुणाला संशय येऊ नये म्हणून मृतदेह पोलीस स्टेशनमध्ये पुरतो असे दाखवण्यात आले आहे. दृश्यममधील पटकथेपासून प्रेरणा घेत प्रत्यक्ष आयुष्यातही या प्रकारच्या हत्या होत आहेत. नालासोपाऱ्यात असाच एक धक्कादायक प्रकार घडला आहे. नालासोपाऱ्यात पत्नीनं प्रियकराच्या मदतीनं पतीची हत्या केली. त्यानंतर कुणालाही याचा सुगावा लागू नये म्हणून त्यांनी घरामध्येच पतीचा मृतदेह गाडला होता. पण, अखेर या हत्येचा उलगडा झाला आहे.
नालासोपारा पूर्वेच्या गडगापाडा परिसरातील विजय चव्हाण (३५) हा त्याची पत्नी कोमल चव्हाण (२८) सोबत रहात होता. विजय मागील १५ दिवसांपासून तो बेपत्ता होता. विजय चव्हाणचे दोन भाऊ त्याचा शोध घेत होते. दरम्यान, दोन दिवसांपूर्वी कोमल चव्हाण देखील बेपत्ता झाली होती. तिच्यापाठोपाठ शेजारी राहणारा मोनू शर्मा हा तरुणही बेपत्ता झाला. कोमल चव्हाण आणि मोनू शर्मा यांच्यात प्रेमसंबंध होते आणि त्यातून ते दोघे पळून गेल्याचे निष्पन्न झाले. दरम्यान, सोमवारी सकाळी चव्हाण यांचे दोन भाऊ गडगापाडा येथील ओम साई या निवासस्थानी आले असता घरातील टाईल्सचे रंग वेगळे दिसून आले. त्यांनी टाईल्स काढली असता त्यांना बनियान दिसला आणि दुर्गंधी येऊ लागली. त्यांनी तात्काळ पोलिसांना बोलावले.पेल्हार पोलीसांनी घटनास्थळ गाठलं आणि लाद्या काढून मृतदेह शोधण्यास शुरुआत केली तसेच फॉरेन्सिक टिम सुद्धा घटनास्थळावर पोहोचली. पोलिसांकडून दोन्ही आरोपींचा शोध सुरु आहे.