धक्कादायक ! लालबागमध्ये बेस्ट बस गर्दीत घुसली; अनेक गाड्यांना धडक, तरुणीचा मृत्यू, आठ पादचारी जखमी
पोलीस महानगर नेटवर्क
मुंबई – मुंबईत ठिकठिकाणी गणेशोत्सवाची लगबग सुरू झाली आहे. गणेशोत्सवाच्या पार्श्वभूमीवर सर्वत्र बाप्पाच्या आगमनाच्या तयारीला वेग आला असून गणेशोत्सव म्हणजे लालबागचा राजा असे एक जणू समीकरण बनलेले आहे. बाप्पाच्या आगमनापासून ते अगदी विसर्जनापर्यंत लालबाग गजबजलेलं असतं. अशातच रविवारी बाप्पाच्या आगमनाच्या धामधुमीत लालबागमधील गणेश टॉकीज परिसरात भीषण अपघात झाला आहे. बेस्ट बसनं तब्बल ९ प्रवाशांना उडवल्याची धक्कादायक घटना परिसरात घडली आहे. या अपघातात एका तरुणीचा मृत्यू झाला असल्याची माहिती समोर येत आहे.
गणेशोत्सवापूर्वीचा शेवटचा रविवार असल्यामुळे लालबागमध्ये मोठी गर्दी होती. त्यात अनेक मंडळांचे आगमन सोहळेदेखील सुरू होते. अशातच बेस्टची ६६ क्रमांकाची बस अनिंत्रित झाली व ९ प्रवाशांना उडवलं. रविवारी रात्रीच्या सुमारास ही घटना घडली. अपघातात ९ जण गंभीर जखमी असल्याची माहिती मिळत आहे. त्यापैकी दोन महिलांची प्रकृती चिंताजनक आहे. त्यातील एका महिलेचा मृत्यू झाला असून एका महिलेची प्रकृती अजूनही चिंताजनक असल्याची माहिती मिळत आहे. या घटनेने लालबाग परिसरात शोककळा पसरली आहे. याबाबत मिळालेली माहिती अशी की, सदर घटना ही मद्यधुंद प्रवाशामुळे घडल्याची चर्चा आहे. बसमध्ये मद्यधुंद प्रवाशानं चालकासोबत वाद घातला आणि नियंत्रण सुटून अपघात झाल्याची माहिती मिळत आहे.