पुण्यात तरुणीचा निर्घृण खून; डोकं, हातपाय कापलेलं धड नदीपात्रात आढळल्यानं खळबळ, चंदननगर पोलीस ठाण्यात गुन्हा दाखल
योगेश पांडे / वार्ताहर
पुणे – पुण्यात तरुणीचा निर्घृण खून केल्याची घटना घडली असून तरुणीचे डोके, हात आणि पाय कापण्यात आले आहेत. तिचं फक्त धड मुळा मुठा नदीत फेकून देण्यात आलं आहे. तिच्या मृतेदेहाचे तुकडे खराडी इथं नदी पात्रात फेकण्यात आलेत. तिचं वय १८ ते ३० दरम्यान असल्याचा अंदाज पोलिसांनी व्यक्त केलाय. पोलीस घटनास्थळी दाखल झाले असून महिलेची ओळख पटवण्याचे प्रयत्न सुरू आहेत. याबाबत मिळालेली माहिती अशी की, खराडी परिसरात जेनी लाईट कन्स्ट्रक्शनचे काम सुरू आहे. तिथून जवळच असणाऱ्या नदी पात्रात तरुणीचा शीर आणि हातपाय नसलेला मृतदेह आढळून आला आहे. फक्त धड आढळून आल्यानंतर याची माहिती पोलिसांना दिली गेली. पोलीस घटनास्थळी दाखल झाले आहेत. मयत तरुणीची ओळख अद्याप पटली नाही. अज्ञात इसमाचा तरुणीला ठार मारून पुरावा नष्ट करण्याचा प्रयत्न केला आहे. मृतदेहाचे धडापासूनचे शीर, दोन्ही हात खांद्यापासून, दोन्ही पाय खुब्यापासून धारदार शस्त्राने कापून टाकले. त्यानंतर हे धड मुळा-मुठा नदीपात्रात टाकून दिले. अज्ञात व्यक्ती विरोधात याप्रकरणी चंदननगर पोलीस ठाण्यात खुनाचा गुन्हा दाखल करण्यात आला आहे. या प्रकरणाचा पुढील तपास पोलीस करत आहेत.