लाखों किमतीच्या एमडीसह अवैध पिस्तूल जप्त; दोन वेगवेगळ्या कारवाईत तिघांना जेरबंद
योगेश पांडे / वार्ताहर
भिवंडी – अमली पदार्थांच्या विळख्यात तरुणाई गुरफटत असतानाचा भिवंडी शहरात ही त्याचा वापर वाढू लागला आहे. भिवंडीतील शांतीनगर पोलिसांनी दोन वेगवेगळ्या कारवाईत तिघा जणांना ताब्यात घेऊन त्यांच्या जवळून तब्बल २१ लाख २० हजार रुपये किमतीचा १०६ ग्रॅम एमडी आणि १५ लाखांची बी एम डबल्यू कारसह एक पिस्टल असा एकूण ३७ लाख ६५ हजारांचा मुद्देमाल जप्त केला आहे. गुन्हेगारी कारवायांमुळे शहरातील हद्दपार केलेला मोहम्मद अली अब्दुल अजीज शेख हा शहरात एम डी विक्रीसाठी येणार असल्याची माहिती मिळाल्यावर शांतीनगर पोलीस ठाण्यातील पोलीस पथकाने त्यास शांतीनगर परिसरातून ११ लाख २० हजार रुपये किमतीचा ५६ ग्रॅम एमडी जप्त केलाय. त्याच वेळी तपासात नाशिक येथील दोन जण एमडी घेऊन येणारा असल्याची माहिती मिळाल्यावर साईबाबा मंदिर परिसरात पोलिसांनी सापळा रचून संशयित बी एम डबल्यु कार मधील दोघा जणांची झडती घेतली असता, त्यांच्या जवळ १० लाख रुपये किमतीचा ५० ग्रॅम एमडी आढळून आला. मुज्जफर मोबिन शेख आणि समीर फिरोज रोकडीया असे दोघांना ताब्यात घेतले. त्यांच्या जवळील मोबाईल ताब्यात घेऊन तपासले असता त्या मध्ये हातात पिस्टल घेऊन वावरत असतानाचा व्हिडिओ आढळून आलाय. त्यानुसार पोलिसांनी नाशिक रोड येथील त्याच्या घरातुन पिस्टल जप्त केली आहे. या दोन्ही प्रकरणी दोन गुन्हे दाखल करण्यात आले आहेत.
तर अशीच एक आणखी कारवाई पोलिसांनी भिवंडीत केली आहे. यात भिवंडी शहरात टँकर घेऊन डिझेल विक्रीसाठी घेऊन आलेल्या दोघा जणांना शांतीनगर पोलिसांनी सापळा रचून अटक केलीय. त्यांच्या जवळून टँकर आणि १५ हजार लिटर डिझेल असा मुद्देमाल जप्त केला असल्याची माहिती शांतीनगर पोलीस ठाण्याचे वरिष्ठ पोलीस निरीक्षक विनायक गायकवाड यांनी पत्रकार परिषदेत दिली आहे.