पैशांच्या वादातून मित्रानेच काढला मित्राचा काटा ; पोलिसांनी केली आरोपीला अटक
परभणी – व्यवसायासाठी दोन मित्रांनी भागीदारीमध्ये ट्रॅक्टर खरेदी केले होते. व्यवसायात चांगला जम बसत असताना मयताच्या वडिलांना दोन लाख पाच हजार रुपये उसने दिले होते. अचानक एकेदिवशी वडिलांना दिलेल्या उसण्या पैशावरून दोघांमध्ये वाद झाला. तो वाद एवढा विकोपाला गेला की वादाचे रूपांतर खुनात झाले. मयत व्यक्तीचे नाव हुसेन उर्फ अल्ताफ अकबर शेख (वय २३, रा. पेडगाव ता. जि. परभणी) असं असून खून करणाऱ्या आरोपीचे नाव शेख उमर शेख रसूल (वय ३८, रा. पेडगाव ता. जि. परभणी) असं आहे.
याबाबत अधिक माहिती अशी की,१६ जानेवारी २०२४ रोजी परभणीच्या पारवा शिवारामध्ये एक मानवी सांगाडा असल्याची बातमी पोलिसांच्या हाती लागली. पोलिसांनी घटनास्थळी धाव घेतली असता सदरील सांगाडा व परिस्थितीची पाहणी केली. कुणीतरी सदर व्यक्तीचा खून केला असावा असा संशय पोलिसांना आल्याने परभणी पोलीस अधीक्षक रगसुधा आर. यांनी तात्काळ आरोपीचा कसून शोध घेण्यासाठी तीन पथके तैनात केली आहेत. पोलिसांनी या कामी तात्काळ शोध घेऊन सदर गुन्ह्यातील आरोपी शेख उमर शेख रसूल याला ताब्यात घेतले. त्याची चौकशी केली असता सदर खून केल्याचे त्याने कबुल केले तसेच हा मानवी सांगाडा परभणीच्या पेडगाव येथील रहिवासी हुसेन उर्फ अल्ताफ अकबर शेख याचा असल्याचे देखील निष्पन्न झाले. गुन्ह्याचे कारण विचारले असता आरोपी शेख उमर शेख रसूलने सांगितले की, “मी आणि अल्ताफ शेख दोघेजण मिळून भागीदारीमध्ये ट्रॅक्टर घेतले होते. त्याचबरोबर त्याच्या वडिलांना मी दोन लाख पाच हजार रुपये उसने दिले होते. उसने दिलेले पैसे परत मिळत नव्हते आणि त्यामुळेच दोघांमध्ये भांडण झाले आणि त्याचा खून केला” असल्याची कबुली आरोपीने दिली आहे. याप्रकरणी पोलीस अधिक तपास करीत आहेत.