गोरेगावमध्ये पेट्रोल ओतून रस्ता पेटवत वाढदिवसाचा भयंकर स्टंट; रील स्टारला पोलिसांनी ठोकल्या बेड्या
योगेश पांडे / वार्ताहर
मुंबई – सोशल मीडियावर प्रसिद्धी मिळवण्यासाठी लोक कोणत्या थराला जाऊ शकतात, याचे एक भयानक उदाहरण मुंबईतील गोरेगावमध्ये पाहायला मिळाले. आपल्या ३३ व्या वाढदिवसानिमित्त एका ३३ वर्षीय तरुणाने चक्क राम मंदिर रोडवर पेट्रोलने ‘३३’ हा आकडा लिहिला आणि त्यावर पेट्रोल ओतून तो पेटवून दिला.
फहाद खलील समशुद्दीन शेख (३३) असे अटक करण्यात आलेल्या आरोपीचे नाव आहे. तो व्यवसायाने कार डीलर आहे. समोर आलेल्या व्हिडिओमध्ये फहाद आधी सिगरेट पेटवताना दिसतो आणि त्यानंतर त्याच काडीने रस्त्यावरील पेट्रोलच्या ट्रेलला आग लावतो. क्षणार्धात रस्त्यावर आगीचे लोट उसळतात. धक्कादायक म्हणजे, आग तशीच सोडून तो आपल्या कारमध्ये बसून आरामात निघून जातो.
२५ एप्रिल रोजी रात्री ११.१० च्या सुमारास मुंबई पोलीस आयुक्तांच्या अधिकृत ‘एक्स’ हँडलवर एका युजरने हा व्हिडीओ टॅग करून तक्रार केली होती. याची दखल घेत गोरेगाव पोलिसांनी तातडीने तपास चक्र फिरवली. पोलिसांनी आरोपीची ओळख पटवून त्याला ताब्यात घेतले.
आरोपीविरुद्ध भारतीय न्याय संहितेच्या कलम २८७ आणि १२५ अंतर्गत गुन्हा दाखल करण्यात आला आहे. सार्वजनिक ठिकाणी, गर्दीच्या रस्त्यावर अशा प्रकारे ज्वलनशील पदार्थाचा वापर करणे ही अत्यंत गंभीर बाब असल्याचे पोलिसांनी म्हटले आहे.