अमराठी चालकांना ‘व्यावहारिक मराठी’चे धडे; प्रवासी सेवेसाठी परिवहन विभागाचा नवा उपक्रम
पोलीस महानगर नेटवर्क
मुंबई : राज्यातील प्रवासी सेवा अधिक सुसंगत, परिणामकारक आणि ग्राहकाभिमुख करण्यासाठी परिवहन विभागाने महत्त्वपूर्ण पाऊल उचलले आहे. अमराठी चालकांना ‘व्यावहारिक मराठी’चे प्रशिक्षण देण्याचा उपक्रम हाती घेण्यात आला असून, त्यासाठी तयार करण्यात आलेल्या संक्षिप्त मार्गदर्शक पुस्तिकेचे प्रकाशन मुख्यमंत्री देवेंद्र फडणवीस यांच्या हस्ते करण्यात आले.
या प्रसंगी बोलताना मुख्यमंत्री फडणवीस यांनी महाराष्ट्रात सेवा देताना स्थानिक भाषेचे ज्ञान आवश्यक असल्याचे स्पष्ट केले. प्रवासी आणि चालक यांच्यातील संवाद सुलभ झाल्यास सेवा अधिक दर्जेदार आणि परिणामकारक होऊ शकते, असे त्यांनी नमूद केले.
‘व्यावहारिक मराठी’च्या माध्यमातून चालकांना दैनंदिन व्यवहारात वापरल्या जाणाऱ्या मराठी शब्दांचा, वाक्यरचनेचा आणि प्रवाशांशी संवाद साधताना आवश्यक असलेल्या भाषिक कौशल्यांचा परिचय करून दिला जाणार आहे. विशेषतः सार्वजनिक वाहतूक, टॅक्सी, रिक्षा आणि अन्य प्रवासी सेवांमध्ये याचा मोठा उपयोग होणार असल्याचे परिवहन विभागाने सांगितले.
या उपक्रमाचे विविध स्तरांवरून स्वागत होत असून, आगामी काळात राज्यभर अशा प्रशिक्षण कार्यक्रमांची अंमलबजावणी करण्याची तयारी परिवहन विभागाने सुरू केली आहे. या माध्यमातून प्रवासी सेवेत लक्षणीय सुधारणा होण्याची अपेक्षा व्यक्त केली जात आहे.