अनेक दिवस पोलिसांच्या रडारवर असलेल्या सराईत गुन्हेगाराला अखेर अटक;९ गंभीर गुन्ह्यांचा उलगडा
योगेश पांडे / वार्ताहर
छत्रपती संभाजीनगर – गेल्या अनेक दिवसांपासून पोलिसांच्या डोळ्यात धूळ फेकून पसार होणाऱ्या एका अट्टल गुन्हेगाराला जेरबंद करण्यात वाळूज पोलिसांना मोठे यश आले आहे. हा आरोपी खूप चपळ होता. तो सहजासहज पोलिसांच्या हाती यायचा नाही. त्याने एखादा गुन्हा केल्यानंतर तो संबंधित जिल्ह्यातूनच गायब व्हायचा. त्यामुळे गुन्ह्याचा तपास करणाऱ्या पोलिसांपुढे मोठं आव्हान उभं राहायचं. आरोपीचा थांगपत्ता कसा लावायचा? याचं पोलिसांपुढे मोठं आव्हान असायचं. पोलीस त्याचा शोध घेण्यासाठी सातत्याने प्रयत्न करत होते. अखेर पोलिसांनी तांत्रिक गोष्टींच्या आधारावर आरोपीच्या मुसक्या आवळल्या आहेत. विशेष म्हणजे त्याला पकडल्यानंतर त्याने अनेक गुन्ह्यांची कबुली देखील दिली आहे. पोलिसांच्या या कारवाईचं सध्या शहरात कौतुक होत आहे.
या प्रकरणातील आरोपीचे नाव राहुल कंत्राज पवार असे आहे. तो डोमेगावचा रहिवासी आहे. त्याच्या अटकेमुळे पाच जिल्ह्यांतील तब्बल ९ गंभीर गुन्ह्यांचा उलगडा झाला आहे. या कारवाईत पोलिसांनी ३ लाख रुपयांहून अधिक किंमतीचा मुद्देमाल जप्त केला आहे.
राहुल पवार हा अत्यंत सराईत चोरटा आहे. त्याची गुन्हे करण्याची पद्धत पोलिसांसाठी मोठे आव्हान ठरली होती. तो एका जिल्ह्यात घरफोडी किंवा चोरी केल्यानंतर तात्काळ आपले ठिकाण बदलून दुसऱ्या जिल्ह्यात आश्रय घेत असे. वाळूज पोलिसांनी त्याचा शोध घेण्यासाठी मिरजगाव, जामखेड, पुणे यांसारख्या विविध भागांत तपास केला. मात्र तो प्रत्येक वेळी पोलिसांना चकवा देऊन पळून जाण्यात यशस्वी होत होता.
वाळूज पोलीस ठाण्याच्या विशेष पथकाने तांत्रिक माहितीच्या आधारे राहुलचा पाठलाग सुरूच ठेवला. अखेर २५ मार्चला पुणे जिल्ह्यातील इंदापूरमध्ये एका परिसरात सापळा रचून त्याला ताब्यात घेण्यात आले. पोलिसी खाक्या दाखवताच त्याने वाळूजसह पुणे, बीड, अहिल्यानगर आणि कोल्हापूर जिल्ह्यांत केलेल्या चोऱ्यांची कबुली दिली. आरोपीकडून चांदीचे ब्रेसलेट आणि दागिने, मौल्यवान साड्या, विदेशी दारूच्या बाटल्या, चोरीच्या एकूण ३ मोटारसायकली जप्त करण्यात आले आहेत. जप्त करण्यात आलेल्या मुद्देमालाची एकूण किंमत ३ लाख ७ हजार २८० रुपये इतकी आहे.
ही धडक कारवाई पोलीस आयुक्त प्रविण पवार, उपायुक्त पंकज अतुलकर, आणि सहायक पोलीस आयुक्त डॉ. भाग्यश्री पवार यांच्या मार्गदर्शनाखाली पोलीस निरीक्षक शिवचरण पांढरे, उपनिरीक्षक अजय शितोळे आणि त्यांच्या पथकाने यशस्वीरीत्या पूर्ण केली.