ब्रँडेड दारूचा मुखवटा, आत विष! कल्याणमध्ये बनावट विदेशी मद्याचा पर्दाफाश
पोलीस महानगर नेटवर्क
कल्याण: ‘ब्रँडेड’ म्हणून विकली जाणारी दारू सुरक्षितच असेल, हा समज कल्याणमध्ये उघडकीस आलेल्या घटनेने खोटा ठरवला आहे. विदेशी ब्रँडच्या बाटल्यांत बनावट व घातक दारू भरून तिचा पुरवठा करणाऱ्या टोळीला अबकारी विभागाच्या भरारी पथकाने टिटवाळा परिसरातून अटक केली. या कारवाईत सुमारे १२ लाख ५ हजार रुपयांचा मुद्देमाल जप्त करण्यात आला आहे.
टिटवाळा मांडा परिसरात एका घरात विदेशी मद्याच्या रिकाम्या बाटल्यांतून मूळ दारू काढून त्याऐवजी बनावट दारू भरली जात असल्याची माहिती अबकारी विभागाला मिळाली होती. त्यानुसार भरारी पथकाने मुंबई–बडोदा प्रस्तावित महामार्गावर सापळा रचला. संशयास्पद वाहन थांबवून तपासणी केली असता त्यामध्ये विदेशी मद्याचा साठा आढळून आला.
या प्रकरणी वाहनचालक रोहन केणे याला ताब्यात घेऊन चौकशी केली असता, टिटवाळा मांडा परिसरात बनावट दारू तयार होत असल्याची कबुली त्याने दिली. त्यानंतर पथकाने जयेश केणे यांच्या घरावर छापा टाकला. घरात बनावट बुच, प्लास्टिक जार, बनावट विदेशी मद्य, विविध नामांकित ब्रँडच्या रिकाम्या काचेच्या बाटल्या तसेच इतर साहित्य आढळून आले.
अबकारी विभागाने तत्काळ सर्व साहित्य जप्त करत जयश्री केणे आणि रोहन केणे या दोघांना अटक केली. ही बनावट दारू शहरातील ढाब्यांवर आणि किरकोळ विक्रेत्यांकडे पुरवली जात असल्याचा दाट संशय असून, त्या दिशेने पुढील तपास सुरू असल्याची माहिती अधिकाऱ्यांनी दिली.
दरम्यान, या घटनेमुळे ‘ब्रँडेड’ दारूच्या नावाखाली होणाऱ्या फसवणुकीचा गंभीर प्रश्न पुन्हा ऐरणीवर आला असून, नागरिकांनी मद्य खरेदी करताना अधिक सतर्क राहण्याचे आवाहन अबकारी विभागाने केले आहे.