पार्टटाइम जॉबच्या आमिषाने चौघांची ३६ लाखांची फसवणूक; सायबर पोलिस ठाण्यात गुन्हा दाखल
पोलीस महानगर नेटवर्क
नाशिक : ऑनलाइन पार्टटाइम जॉबच्या नावाखाली पैसे कमावण्याचे आमिष दाखवत चौघांची तब्बल ३६ लाख ८८२ रुपयांची फसवणूक झाल्याचा प्रकार उघडकीस आला आहे. या प्रकरणी सायबर पोलिस ठाण्यात अज्ञात आरोपींविरोधात गुन्हा दाखल करण्यात आला असून, फसवणूक झालेल्यांमध्ये एक महिला आणि तीन पुरुषांचा समावेश आहे.
पोलिसांनी दिलेल्या माहितीनुसार, फिर्यादी व इतर तिघांना विविध व्हॉट्सॲप क्रमांक तसेच टेलिग्रामवरून संपर्क साधण्यात आला. संबंधित अज्ञात व्यक्तींनी सोप्या ऑनलाइन पार्टटाइम जॉबमधून चांगले उत्पन्न मिळेल, असे सांगत विश्वास संपादन केला. त्यानंतर विविध कारणे पुढे करत वेगवेगळ्या बँक खात्यांमध्ये पैसे भरण्यास भाग पाडले.
आरोपींच्या सूचनेनुसार फिर्यादी व त्याच्या साथीदारांनी सांगितलेल्या पॅन खात्यांवर एकूण ३६ लाख ८८२ रुपये ट्रान्स्फर केले. मात्र, रक्कम जमा करूनही कोणताही जॉब न मिळाल्याने तसेच पैसे परत मागितल्यानंतरही आरोपींनी प्रतिसाद न दिल्याने आपली फसवणूक झाल्याचे त्यांच्या लक्षात आले.
या प्रकरणाचा तपास सायबर पोलिस ठाण्याचे वरिष्ठ पोलिस निरीक्षक संजय पिसे करत आहेत. दरम्यान, अलीकडच्या काळात ऑनलाइन फसवणुकीच्या घटनांमध्ये वाढ होत असल्याचे पोलिसांनी नमूद केले आहे. सोशल मीडियावर किंवा इतर ऑनलाइन माध्यमांवर मिळणाऱ्या आकर्षक ऑफर्स आणि पार्टटाइम जॉबच्या आमिषांना बळी न पडता नागरिकांनी सतर्क राहावे, असे आवाहन सायबर पोलिसांकडून करण्यात आले आहे.