पुण्यातील येरवडा जेलमध्ये दोन कैद्यांची झाली दोस्ती, बाहेर आल्यावर दोघांनी मिळून केला मोठा कांड; पोलिसांनी दोघांना ठोकल्या बेड्या
योगेश पांडे / वार्ताहर
कोल्हापूर – पुण्यातील येरवडा जेलमधून चार महिन्यांच्या कैदेनंतर बाहेर पडलेल्या दोन कुख्यात चोरट्यांनी कोल्हापूर जिल्ह्यातील भुदरगड तालुक्यात धुमाकूळ घातला. आदमापूर येथील शेतात काम करणाऱ्या दोन महिलांकडून पाणी मागण्याच्या बहाण्याने सोन्याचे दागिने हिसकावून त्यांनी पोबारा केला. स्थानिक गुन्हे अन्वेषण शाखेच्या पथकाने पुणे-बंगळूर महामार्गावर किणी टोलनाक्याजवळून या सराईत गुन्हेगारांना बेड्या ठोकल्या. त्यांच्याकडून २ लाख ७० हजार रुपयांची किंमत असलेला मुद्देमाल हस्तगत करण्यात आला. याआधीच त्यांच्या रेकॉर्डवर डझनभर गुन्हे नोंदवले गेले आहेत.
पोलिसांनी ताब्यात घेतलेल्या या संशयितांची नावे राम ज्ञानोबा केंद्रे (२७) आणि मनोज शिवाजी लंगडे (३४) अशी आहेत. हे दोघे चार महिन्यांपूर्वी पुण्यातील चोरीच्या गुन्ह्यात येरवडा जेलमध्ये कैदेत होते. तिथे झालेल्या ओळखीतून बाहेर पडल्यानंतर एकत्र चोऱ्या करण्याचा कट त्यांनी रचला. जामीन मंजूर होताच २ डिसेंबर रोजी एसटीने कोल्हापुरात दाखल झाले आणि चोरीच्या उद्देशाने भुदरगड तालुक्यातील आदमापूरकडे वळले.
चार दिवस मंदिर परिसरात मुक्काम करून गर्दीत चोरीचा प्रयत्न अयशस्वी झाल्याने त्यांनी गावापासून दूर खळखळीचा माळ येथील शेताकडे लक्ष केंद्रित केले. दि. ७ डिसेंबर २०२५ रोजी दुपारी पाणी पिण्याच्या बहाण्याने शेतात काम करणाऱ्या लक्ष्मीबाई सर्जेराव भोसले (६७) आणि लक्ष्मी दिनकर पाटील यांच्याकडे जाऊन त्यांच्या गळ्यातील दीड तोळे वजनाचे मंगळसूत्र आणि अर्धा तोळा वजनाची एकसर माळ हिसकावली. या जबरी चोरीप्रकरणी भुदरगड पोलिस ठाण्यात गुन्हा दाखल झाला होता.
स्थानिक गुन्हे शाखेच्या पथकाने परिसरातील सीसीटीव्ही फुटेज आणि तांत्रिक माहितीच्या आधारे चोरट्यांचा शोध घेतला. पुणे-बंगळूर महामार्गावर किणी टोलनाक्याजवळ पानाच्या टपरीजवळ त्यांचा वावर असल्याची माहिती मिळताच सहायक पोलिस निरीक्षक सागर वाघ यांच्या नेतृत्वाखालील पथकाने रविवारी दोघांना ताब्यात घेतले. पोलिस निरीक्षक सुशांत चव्हाण यांनी सांगितले, की राम केंद्रे याच्यावर पुणे, रायगड, लातूर, सोलापूरसह भुदरगडमधील दोन गुन्ह्यांचा रेकॉर्ड आहे. तर मनोज लंगडे याच्यावर पुणे शहर, कोंडवा आणि इतर ठिकाणी गुन्हे दाखल आहेत. दोघांनीही आदमापूर येथील चोरीची कबुली दिली असून, त्यांच्याकडून २ लाख ७० हजार किमतीचे दागिने जप्त केले आहेत.
उपनिरीक्षक शेष मोरे, अंमलदार राजू कोरे, योगेश गोसावी, अमित सर्जे यांच्या पथकाने या गुन्ह्याचा तपास केला. पुढील तपासासाठी संशयितांना भुदरगड पोलिसांकडे सुपूर्द करण्यात आले आहे. पोलिसांनी सांगितले, की या चोरट्यांच्या रेकॉर्डमधून आणखी गुन्हे उघडकीस येतील तसेच परिसरातील नागरिकांना सतर्क राहण्याचा इशाराही पोलिसांनी दिला आहे.