शेलबारी घाटात उत्पादन शुल्कची धडक; ७१ लाखांचा विदेशी मद्यसाठा, तीन आलिशान गाड्या जप्त
पोलीस महानगर नेटवर्क
धुळे : परराज्यातून होणाऱ्या अवैध मद्यवाहतुकीवर राज्य उत्पादन शुल्क विभागाने शेलबारी घाट परिसरात जोरदार कारवाई करत तब्बल ७१ लाख ७३ हजार ८६४ रुपयांचा मुद्देमाल जप्त केला. या कारवाईत नामांकित ब्रँड्सचा विदेशी मद्यसाठा तसेच टोयोटा कंपनीच्या दोन आणि किया कंपनीची एक अशी तीन महागडी वाहने ताब्यात घेण्यात आली. या धडक कारवाईमुळे मद्यतस्करांमध्ये खळबळ उडाली आहे.
राज्य उत्पादन शुल्क आयुक्त डॉ. राजेश देशमुख आणि अधीक्षक स्वाती काकडे यांच्या मार्गदर्शनाखाली ही मोहीम राबवण्यात आली. शिरपूर बिटचे दुय्यम निरीक्षक एस. एफ. ठेंगडे यांना मिळालेल्या खात्रीशीर माहितीनुसार साक्री तालुक्यातील शेलबारी शिवारात पथकाने सापळा रचला होता.
नाशिकहून पिंपळनेरच्या दिशेने येणाऱ्या तीन संशयास्पद वाहनांना पथकाने थांबवण्याचा प्रयत्न केला. मात्र, कारवाईचा अंदाज येताच चालकांनी वाहने रस्त्याच्या कडेला उभी करून अंधाराचा फायदा घेत जंगलात पळ काढला. वाहनांची तपासणी केली असता त्यामध्ये रॉयल स्टॅग, ब्लेंडर प्राईड, मॅजिक मोमेंट्स यांसारख्या ब्रँड्सचा मोठ्या प्रमाणावर विदेशी मद्यसाठा आणि बिअर आढळून आली.
या कारवाईत १४ लाख ७३ हजार ८६४ रुपये किमतीचा मद्यसाठा आणि ५७ लाख रुपये किमतीची वाहने असा एकूण ७१ लाख ७३ हजार ८६४ रुपयांचा मुद्देमाल जप्त करण्यात आला.
या प्रकरणी फरार चालक आणि वाहनमालकांविरुद्ध महाराष्ट्र दारूबंदी कायदा, १९४९ अंतर्गत गुन्हा दाखल करण्यात आला आहे. जवान अमोल धनगर यांनी फिर्याद दिली असून, दुय्यम निरीक्षक एस. एफ. ठेंगडे पुढील तपास करत आहेत. अवैध मद्यनिर्मिती, वाहतूक किंवा विक्रीबाबत माहिती मिळाल्यास तातडीने राज्य उत्पादन शुल्क विभागाशी संपर्क साधावा, असे आवाहन विभागाने केले आहे.