भिवंडीत अवैध गुटखा वाहतुकीवर मोठी कारवाई; ५५ लाखांचा गुटखा, तीन टेम्पो जप्त
पोलीस महानगर नेटवर्क
भिवंडी : आगामी महापालिका निवडणुकांच्या पार्श्वभूमीवर भिवंडी शहरात गुन्हे शाखेने अवैध गुटखा वाहतुकीवर मोठी कारवाई करत तीन जणांना ताब्यात घेतले आहे. या कारवाईत सुमारे ५४ लाख ९९ हजार रुपयांचा प्रतिबंधित गुटखा तसेच तीन टेम्पो असा एकूण ७७ लाख ९९ हजार रुपयांचा मुद्देमाल जप्त करण्यात आला आहे.
दि. १ जानेवारी २०२६ रोजी परिमंडळ-२, भिवंडी हद्दीत गुन्हे शाखा घटक-२चे अधिकारी व अंमलदार वॉच पेट्रोलिंग करत असताना, दोन टेम्पोंमधून अवैध गुटखा भादवड नाक्याकडून कल्याण नाक्याच्या दिशेने नेण्यात येणार असल्याची गोपनीय माहिती पोलिसांना मिळाली. या माहितीच्या आधारे वरिष्ठ पोलीस निरीक्षक शीतल राऊत यांच्या मार्गदर्शनाखाली आसबीबी मशिदसमोर सापळा रचण्यात आला.
पोलिसांनी टाटा इंट्रा, महिंद्रा विरो आणि आयशर कंपनीचे टेम्पो अडवून तपास केला असता, त्यामध्ये मोठ्या प्रमाणात प्रतिबंधित गुटखा आढळून आला. याप्रकरणी गणेश संजय मस्कर, अक्षय सदाशिव गुडेकर आणि अजिम वहीद शेख या तिघांना ताब्यात घेण्यात आले.
या प्रकरणी भिवंडी शहर पोलीस ठाण्यात गुन्हा रजिस्टर क्रमांक ०४/२०२६ नुसार अन्न सुरक्षा व मानदे कायदा २००६ तसेच भारतीय न्याय संहिता २०२३ अंतर्गत विविध कलमांन्वये गुन्हा दाखल करण्यात आला आहे. पुढील तपास सपोनि श्रीराज माळी हे करीत आहेत.
ही कारवाई पोलीस उप आयुक्त अमर सिंह जाधव आणि सहायक पोलीस आयुक्त शेखर बागडे यांच्या मार्गदर्शनाखाली गुन्हे शाखा, घटक-२ भिवंडीच्या पथकाने केली. या धडक कारवाईमुळे अवैध गुटखा व्यापार्यांमध्ये खळबळ उडाली आहे.