ठाण्यातील जागा वाटपाचा वाद तापला; भाजपच्या बैठकीत हायव्होल्टेज ड्रामा, डावखरे आक्रमक
योगेश पांडे / वार्ताहर
ठाणे – उमेदवारी अर्ज दाखल करण्यासाठी शेवटचे काही दिवस शिल्लक असताना अजूनही महायुतीमधील जागा वाटपाचा पेच सुटला नसल्याचे चित्र आहे. शिवसेना शिंदे गटाचे मुख्य नेते आणि राज्याचे उपमुख्यमंत्री एकनाथ शिंदे यांचे होमग्राउंड असलेल्या ठाण्यात जागा वाटपाचा पेच कायम आहे. ठाण्यात स्वबळावर निवडणूक लढवण्याची तयारी भाजपने केली असली तरी महायुतीचे प्रयत्न सुरू आहेत. मात्र, महायुतीत सन्मानजनक जागांची मागणी भाजपने केली आहे. ठाणे महापालिका निवडणुकीबाबत भाजप प्रदेशाध्यक्ष रविंद्र चव्हाण यांनी बोलावलेल्या भाजप नेत्यांच्या बैठकीत हायव्होलटेज ड्रामा झाला. भाजप आमदार निरंजन डावखरे चांगलेच आक्रमक दिसून आले.
भाजपा प्रदेशाध्यक्ष रविंद्र चव्हाण यांच्या मुंबईतील शासकीय निवासस्थानी ठाण्यातील भाजप नेत्यांची बैठक पार पडली. ठाणे महापालिका निवडणुकीच्या पार्श्वभूमीवर भाजपमध्ये जागावाटपाबाबतची भूमिका अधिक आक्रमक होताना दिसत आहे. ठाणे भाजपाचे निवडणूक प्रभारी निरंजन डावखरे यांनी आगामी महापालिका निवडणुकीत भाजपने जास्तीत जास्त जागा लढवाव्यात, असा ठाम आणि परखड आग्रह धरला.
सूत्रांनी दिलेल्या माहितीनुसार, डावखरे यांनी स्पष्टपणे सांगितले की, गेल्या नऊ वर्षांत ठाण्याच्या राजकीय परिस्थितीत मोठे बदल झाले आहेत. ही निवडणूक पूर्णपणे कार्यकर्त्यांची आहे. त्यामुळे कार्यकर्त्यांना नाराज करून चालणार नाही, असा ठाम इशाराही त्यांनी दिला. लोकसभा, विधानसभा आणि नगरपालिका निवडणुकांमध्ये भाजपला मिळालेल्या यशामागे कार्यकर्त्यांचे कष्ट कारणीभूत असल्याचे त्यांनी अधोरेखित केले. याच पार्श्वभूमीवर, ठाणे महापालिका निवडणुकीत भाजपने जास्तीत जास्त जागांवर दावा करावा, अशी मागणी निरंजन डावखरे यांनी भाजप प्रदेशाध्यक्ष रविंद्र चव्हाण यांच्याकडे केली आहे.
दरम्यान, या बैठकीत ठाणे महापालिका निवडणुकीतील रणनीती, जागावाटप आणि संघटनात्मक तयारीवर सविस्तर चर्चा झाल्याची माहिती आहे. या बैठकीनंतर ठाण्यातील भाजपची भूमिका अधिक ठोस झाल्याचे चित्र आहे. आता महायुतीतील जागावाटप चर्चांमध्ये भाजपकडून आक्रमक भूमिका घेतली जाण्याची शक्यता वर्तवली जात आहे.