एकनाथ शिंदेंना ठाण्यात मोठा धक्का; माजी महापौर मीनाक्षी शिंदे यांचा महिला आघाडी प्रमुखपदाचा राजीनामा
पोलीस महानगर नेटवर्क
ठाणे : महापालिका निवडणुका जवळ येत असताना ठाण्यातील शिवसेनेत अंतर्गत मतभेद उफाळून आले आहेत. पक्षाच्या महिला आघाडी प्रमुख आणि ठाण्याच्या माजी महापौर मीनाक्षी शिंदे यांनी आपल्या पदाचा राजीनामा दिला असून, हा निर्णय पक्षासाठी अनपेक्षित धक्का मानला जात आहे. “सध्याच्या परिस्थितीत या पदावर काम करणे शक्य नसल्याने” आपण पायउतार होत असल्याचे कारण त्यांनी पत्रात नमूद केले. मात्र, राजीनाम्यामागे खोलवर राजकीय घडामोडी असल्याची चर्चा पक्षात सुरु आहे.
ठाणे हा माजी मुख्यमंत्री एकनाथ शिंदे यांचा मजबूत गड मानला जातो. अशा वेळी त्यांच्याच जवळच्या समजल्या जाणाऱ्या मीनाक्षी शिंदे यांनी पायउतार होणे, आगामी निवडणुकीच्या दृष्टीने महत्त्वाचे संकेत देणारे ठरत आहे. भूषण भूईरे यांना पुन्हा उमेदवारी देऊ नये, या मागणीसाठी पक्षाच्या काही शाखांतील पदाधिकाऱ्यांनी आंदोलन केले होते. या आंदोलनात सहभागी असलेले शाखाप्रमुख विक्रांत वायचळ हे मीनाक्षी शिंदे यांचे निकटवर्तीय मानले जातात.
पक्षविरोधी कारवाईच्या आरोपावरून विक्रांत वायचळ यांची नुकतीच हकालपट्टी करण्यात आली. त्यानंतर पक्षात नाराजी वाढल्याचे चित्र असून, याच विकासामुळे मीनाक्षी शिंदे यांनीही राजीनामा दिल्याची चर्चा राजकीय वर्तुळात रंगली आहे. पक्षात अंतर्गत तणाव वाढत असल्याचे संकेत मिळत असून, वरिष्ठ नेतृत्व आता समन्वयासाठी पुढाकार घेते का याकडे लक्ष लागले आहे.
२०१७ च्या ठाणे महापालिका निवडणुकीत शिवसेनेने ६७ जागा जिंकत सत्ता राखली होती. त्यावेळी मीनाक्षी शिंदे महापौरपदी निवडल्या गेल्या. नंतरच्या काळात शिंदे गटाच्या बंडानंतर त्यांनी मुख्यमंत्री एकनाथ शिंदे यांची साथ कायम ठेवली होती. आता त्यांच्या राजीनाम्यामुळे शिंदे गटातही अस्थिरता वाढल्याचे पाहायला मिळत असून, येणाऱ्या महापालिका निवडणुकीच्या पार्श्वभूमीवर ही मोठी राजकीय घडामोड ठरत आहे.