सांगलीत भाड्याने घेतलेल्या बँक खात्यांतून सायबर फसवणूक; तरुण अटकेत
पोलीस महानगर नेटवर्क
सांगली – विविध व्यक्तींची बँक खाती भाड्याने किंवा कमिशनवर घेऊन त्यांचा सायबर फसवणुकीसाठी वापर करणाऱ्या तरुणाला सांगली सायबर पोलिसांनी अटक केली आहे. अटक करण्यात आलेल्या तरुणाकडून १७ बँक पासबुके, ३४ डेबिट कार्ड, २७ मोबाईल सिमकार्ड, सहा मोबाईल फोन आणि एक मोटार असा सुमारे ११ लाख रुपयांचा मुद्देमाल जप्त करण्यात आला आहे.
पोलीस निरीक्षक संजय हारगुडे यांनी दिलेल्या माहितीनुसार, पोलीस अधीक्षक संदीप घुगे यांनी सायबर फसवणुकीतील गुन्हेगारांचा शोध घेण्याचे आदेश दिले होते. त्यानुसार सायबर पोलीस ठाण्याने तपास सुरू केला असता काही बँक शाखांमध्ये विशिष्ट मोबाईल क्रमांकावरून नेट बँकिंगद्वारे संशयास्पद आर्थिक व्यवहार होत असल्याचे आढळून आले. याबाबत खात्रीशीर माहिती मिळाल्यानंतर पोलिसांनी सापळा रचत जैब जावेद शेख (वय २२, रा. मीरा हौसिंग सोसायटी, ओंकार अपार्टमेंट, टिंबर एरिया) याला ताब्यात घेतले.
कसून चौकशीत शेख याने सायबर फसवणुकीत सहभाग असल्याची कबुली दिली. त्याच्याकडून मारुती बलेनो (एमएच १४ जीए ६९३२) हे वाहनही जप्त करण्यात आले आहे. तपासात असे निष्पन्न झाले की, संशयिताने साथीदारांच्या मदतीने विविध व्यक्तींच्या नावे बँक खाती उघडली होती. या खात्यांचा वापर सायबर फसवणुकीतून मिळालेली रक्कम वळविण्यासाठी केला जात होता. संबंधित खातेदारांना त्याबदल्यात भाडे किंवा कमिशन दिले जात असल्याची माहितीही समोर आली आहे. या प्रकरणाचा पुढील तपास सांगली सायबर पोलीस करीत आहेत.