येरवडा कारागृहात कैद्यावर फरशीने प्राणघातक हल्ला; खुनाचा प्रयत्नप्रकरणी दोघांविरुद्ध गुन्हा दाखल
पोलीस महानगर नेटवर्क
पुणे : येरवडा कारागृहातील बराकीत झालेल्या वादातून दोन कैद्यांनी एका कैद्यावर फरशीच्या तुकड्याने प्राणघातक हल्ला केल्याची गंभीर घटना घडली आहे. डोक्यात फरशी घालून खुनाचा प्रयत्न केल्याप्रकरणी दोघांविरुद्ध गुन्हा दाखल करण्यात आला आहे.
विशाल नागनाथ कांबळे (वय २८, रा. लक्ष्मीनगर, येरवडा) असे गंभीर जखमी झालेल्या कैद्याचे नाव असून त्याच्यावर ससून रुग्णालयात उपचार सुरू आहेत. याप्रकरणी आकाश सतीश चंडालिया (वय ३०, रा. जय जवाननगर, येरवडा) आणि दीपक संजय रेड्डी (वय २७, रा. इंद्रायणी कॉलनी, कामशेत) यांच्याविरुद्ध गुन्हा दाखल करण्यात आला आहे. कारागृह अधिकारी सचिन गुरव यांनी येरवडा पोलीस ठाण्यात याबाबत फिर्याद दिली आहे.
पोलिसांनी दिलेल्या माहितीनुसार, चंडालिया, रेड्डी आणि कांबळे हे तिघेही सराईत गुन्हेगार असून येरवडा भागातील एका खून प्रकरणात चंडालियाला अटक करण्यात आली होती. येरवडा कारागृहातील सी.जे. विभागातील बराक क्रमांक एकमध्ये तिघांना ठेवण्यात आले होते. कारागृहात असतानाच त्यांच्यात वारंवार वाद होत होते.
सोमवारी (१५ डिसेंबर) सायंकाळी सुमारे पावणेसातच्या सुमारास चंडालिया आणि रेड्डी यांनी कांबळे याच्यावर फरशीच्या तुकड्याने हल्ला केला. डोक्यात जोरदार मार लागल्याने कांबळे गंभीर जखमी झाला. आरडाओरडा ऐकून कारागृहातील रक्षकांनी तत्काळ घटनास्थळी धाव घेत आरोपींना आवरले.
जखमी कांबळे याला तातडीने रुग्णालयात दाखल करण्यात आले. घटनेची माहिती मिळताच येरवडा विभागाच्या सहायक पोलीस आयुक्त प्रांजली सोनवणे आणि वरिष्ठ पोलीस निरीक्षक अंजुम बागवान यांनी घटनास्थळी भेट दिली. खुनाचा प्रयत्न केल्याप्रकरणी दोघांविरुद्ध गुन्हा दाखल करण्यात आला असून सहायक पोलीस निरीक्षक जराड पुढील तपास करीत आहेत.
येरवडा कारागृहात यापूर्वीही किरकोळ वादातून कैद्यांमध्ये हाणामारी, मोबाइल चोरी तसेच अमली पदार्थांच्या तस्करीसारखे प्रकार घडले होते. या पार्श्वभूमीवर कारागृहात सीसीटीव्ही कॅमेरे बसविण्यात आले होते. कॅमेरे बसवल्यानंतर अशा घटनांमध्ये काही प्रमाणात घट झाली असली तरी सदर घटनेमुळे कारागृहातील सुरक्षिततेचा प्रश्न पुन्हा ऐरणीवर आला आहे.