वर्षभर पोलिसांना गुंगारा देणाऱ्या सराईताला अखेर बेड्या; एकट्या महिलांचा पाठलाग करून विनयभंग करणारा गुन्हेगार विमानतळ पोलिसांच्या ताब्यात
योगेश पांडे / वार्ताहर
पुणे : रात्रीच्या वेळी सुनसान रस्त्यांवर एकट्या महिलांना लक्ष्य करून त्यांची छेड काढणाऱ्या आणि तब्बल वर्षभर पोलिसांना चकवा देणाऱ्या सराईताला अखेर विमानतळ पोलिसांनी जेरबंद केले. २४५ सीसीटीव्ही कॅमेऱ्यांचे फुटेज तपासून या विकृताचा शोध घेण्यात पोलिसांना मोठे यश मिळाले. सागर राम सोनवणे (२२) असे अटक करण्यात आलेल्या आरोपीचे नाव आहे.
लोहगाव आणि गणेश पार्क परिसरात अल्पवयीन मुलीचा पाठलाग करून तिचा विनयभंग केल्याची घटना नुकतीच घडली होती. त्यानंतर भारतीय न्याय संहिता (बीएनएस) कलम ७४, ७५ आणि पोस्को कायद्याच्या कलम ८ आणि १२ अन्वये गुन्हा (गु.र.क्र. ६२४/२०२५) दाखल झाला. परिसरात अशा घटना वारंवार घडत असल्याने नागरिकांमध्ये भीतीचे वातावरण निर्माण झाले होते.
या प्रकरणाचे गांभीर्य लक्षात घेऊन वरिष्ठ पोलीस निरीक्षक गोविंद जाधव यांनी तातडीने तपास गतीमान करण्याचे आदेश दिले. तपास पथकाने विमाननगर, विश्रांतवाडी, दिघी आणि भोसरी परिसरातील शेकडो सीसीटीव्ही कॅमेरे तपासले. तांत्रिक विश्लेषणातून आरोपीचा माग काढत पोलिसांनी सापळा रचून त्याला शिताफीने पकडले.
तपासात सागर सोनवणे याची विनयभंगाच्या घटनांची साखळी उघड झाली. रात्रीच्या वेळी दुचाकीवरून फिरत तो एकट्या महिलांचा शोध घेत असे. अंधाऱ्या किंवा सुनसान रस्त्यांवर महिलांना लक्ष्य करून विनयभंग करत तो पळ काढत असे. सीसीटीव्ही टाळण्यासाठी तो मुद्दाम आडरस्त्यांची निवड करत असल्याचेही निष्पन्न झाले. चौकशीत त्याने विमानतळ पोलीस ठाण्याच्या हद्दीत पाच वेळा विनयभंग केल्याची कबुली दिली असून इतर ठाण्यांच्या हद्दीतही त्याने अशाच प्रकारचे गुन्हे केल्याचे समोर आले आहे.
ही कारवाई पोलीस आयुक्त अमितेश कुमार, सहआयुक्त रंजनकुमार शर्मा, अपर पोलीस आयुक्त मनोज पाटील, उपायुक्त सोमय मुंडे आणि एसीपी प्रांजली सोनवणे यांच्या मार्गदर्शनाखाली करण्यात आली. वरिष्ठ पोलीस निरीक्षक गोविंद जाधव आणि पोलीस निरीक्षक (गुन्हे) शरद शेळके यांच्या मार्गदर्शनाखालील पथकाने ही कामगिरी केली.