चिंचवडमध्ये ट्रेडिंग फसवणूक : निवृत्त व्यक्तीचे तब्बल ३७ लाख रुपये लंपास
पोलीस महानगर नेटवर्क
पिंपरी-चिंचवड : ऑनलाइन ट्रेडिंग व स्टॉक मार्केटिंगमध्ये गुंतवणुकीचे आमिष दाखवून चिंचवड परिसरातील एका निवृत्त व्यक्तीला तब्बल ₹३७ लाख २३ हजार ८५० रुपयांना गंडा घालण्यात आल्याचा धक्कादायक प्रकार उघडकीस आला आहे. या प्रकरणी चिंचवड पोलिस ठाण्यात विविध कलमांनुसार गुन्हा नोंदवण्यात आला आहे.
तक्रारदार चंद्रशेखर विनायक चौधरी (वय ६०, रा. फ्लॅट क्र. ६, श्याम अपार्टमेंट, तानाजीनगर, चिंचवड) यांच्याशी आरोपींनी खास तयार केलेल्या व्हॉट्सऍप ग्रुपच्या माध्यमातून संपर्क प्रस्थापित केला. अत्यंत आकर्षक नफ्याचे आश्वासन देत स्टॉक मार्केट ट्रेडिंगमध्ये गुंतवणूक करण्यास भाग पाडले. २४ जुलै २०२५ ते ५ ऑगस्ट २०२५ या कालावधीत विविध व्यवहारांद्वारे तक्रारदारांकडून लाखो रुपये उकळले.
तक्रारीत नमूद केलेल्या माहितीप्रमाणे, कीर्तन मेहता, अंकिता घोष, आदित्य शर्मा अशा व्यक्तींच्या नावाने नोंद असलेल्या मोबाईल क्रमांक व संशयित बँक खात्यांचा या व्यवहारात वापर करण्यात आला. आर्थिक फसवणुकीसाठी आरोपींनी बनावट ट्रेडिंग प्लॅटफॉर्मचे स्क्रीनशॉट, नफा दाखवणारे ग्राफ आणि गुंतवणूक दुप्पट होईल असे संदेश पाठवून तक्रारदारांचा विश्वास संपादन केल्याचे समोर आले आहे.
या प्रकरणी चिंचवड पोलीस ठाण्यात भा.दं.वि. कलम ३१९(२), ३१८(४) तसेच माहिती तंत्रज्ञान अधिनियमाच्या कलम ६६(क) आणि ६६(ड) अंतर्गत गुन्हा दाखल करण्यात आला आहे. पुढील तपास वरिष्ठ पोलिस अधिकाऱ्यांच्या मार्गदर्शनाखाली सुरु आहे.
या घटनेमुळे ऑनलाइन गुंतवणुकीच्या नावाखाली सुरु असलेल्या फसवणूक रॅकेटबाबत पुन्हा एकदा गंभीर प्रश्नचिन्ह निर्माण झाले आहे. नागरिकांनी अनोळखी लिंक, व्हॉट्सऍप ग्रुप, अपरिचित व्यक्तींकडून मिळणारी ‘जास्त नफ्याची’ ऑफर यांपासून सावध राहण्याचे आवाहन पोलिसांनी केले आहे.