“स्क्रीन टाईम वाढल्याने मुलांची एकाग्रता हरवत चालली” – इंद्रजित देशमुख

Spread the love

“स्क्रीन टाईम वाढल्याने मुलांची एकाग्रता हरवत चालली” – इंद्रजित देशमुख

रवि निषाद / मुंबई

मुंबई – मोबाईलच्या वाढत्या वापराबरोबरच पालकांसह मुलांचाही स्क्रीन टाईम झपाट्याने वाढत असून त्याचा थेट परिणाम मुलांच्या एकाग्रतेवर होत असल्याची खंत निवृत्त प्रशासकीय अधिकारी इंद्रजित देशमुख यांनी व्यक्त केली. विद्यार्थी उत्कर्ष मंडळाच्या वतीने लालबाग येथे आयोजित ६८व्या विवेकानंद व्याख्यानमालेतील “आभासी जगातील पालकत्व” या विषयावरच्या चौथ्या व्याख्यानावेळी ते बोलत होते.

देशमुख म्हणाले, “कोणत्याही क्षेत्रात यशस्वी होण्यासाठी एकाग्रता अत्यावश्यक आहे. मात्र वाढत्या स्क्रीन टाईममुळे मुलांची एकाग्रता कमी होत चालली आहे. त्यावर उपाय म्हणून पालकांनी मुलांशी संवाद साधावा, त्यांना बाहेर फिरायला घेऊन जावे, त्यांच्या सोबत खेळावे.”

पालकांचे पाच प्रकार;

हुकूमशहा, घाबरट, तटस्थ, रूढीवादी आणि सुजाण अशा वर्गवारीचा उल्लेख करत देशमुख म्हणाले, “मुलं लहान असताना त्यांना संरक्षणात्मक ‘कुंपण’ आवश्यक असते. मात्र मोठे होत असताना समाज व कुटुंबीयांचा त्यांच्यावर सुमारे ८०% प्रभाव पडतो.”

भारताची तरुण पिढी ओटीटी प्लॅटफॉर्मवरील हिंसक आणि घृणास्पद कंटेंट पाहण्यात वेळ घालवत असल्याने ती अधिक आक्रमक बनत असल्याबद्दलही त्यांनी चिंता व्यक्त केली.

कार्यक्रमाला महानगर बँकेचे संचालक सतीश खणकर प्रमुख पाहुणे म्हणून उपस्थित होते. सर्वाधिक सत्र तिकीट विक्री करणाऱ्या वेदिका शिंदे आणि पियुष तिवारी यांचा मान्यवरांच्या हस्ते गौरव करण्यात आला.

यावेळी प्रास्ताविक अभ्यासिका व प्रकल्प प्रमुख दिलीप शिर्के यांनी केले. मान्यवरांचा परिचय व आभार प्रार्थना प्रमुख प्रशांत वाणी यांनी प्रस्तावित केले. बोधपट वाचन सार्थक खेडेकर यांनी तर सुस्वागतम नावीन हळदणकर यांनी केले. कार्यक्रमात गीत सादरीकरण सुधीर फके यांनी केले.

Leave a Reply

Your email address will not be published. Required fields are marked *

Right Menu Icon