विवाहितेला घरी बोलावून विमा कंपनीच्या मॅनेजरकडून अत्याचार; पत्नीने केला व्हिडिओ, पनवेल पोलिसांकडून आरोपीस अटक, पत्नी फरार
योगेश पांडे / वार्ताहर
नवी मुंबई – कॉर्पोरेट क्षेत्रातील उच्च पदावर कार्यरत असलेल्या एका नराधमाने सहकर्मी महिलेला आपल्या जाळ्यात ओढून तिच्यावर लैंगिक अत्याचार केल्याची धक्कादायक घटना समोर आली आहे. अत्याचाराचे चित्रीकरण करून त्याचा वापर करत लाखो रुपयांची खंडणी उकळल्याचे या प्रकरणातून उघड झाले आहे.
पनवेल शहर पोलिसांनी आरोपी प्रदीप नरळे (३४, राहणार पनवेल) याला अटक केली असून, या कृत्यात त्याला साथ देणारी पत्नी रेणुका नरळे व भाऊ प्रवीण नरळे हे दोघे सध्या फरार आहेत. पोलिस त्यांचा शोध घेत आहेत.
आरोपी प्रदीप नरळे हा अंधेरी येथील एका प्रतिष्ठित विमा कंपनीत शाखा व्यवस्थापक म्हणून कार्यरत होता. त्याची नागपूर शाखेत कार्यरत असलेल्या ३२ वर्षीय विवाहित महिलेशी ऑनलाईन मीटिंगदरम्यान ओळख झाली. कामाच्या निमित्ताने संवाद वाढत जाऊन संबंध प्रस्थापित झाले.
२७ मार्च रोजी पीडित महिला कामानिमित्त मुंबईत आली असता नरळे याने तिला पनवेल येथील घरी बोलावले. त्यावेळी त्याची पत्नी रेणुका हीही घरी होती. पाहुणचाराच्या बहाण्याने आरोपीने महिलेला गुंगीकारक औषध मिसळलेले अन्न दिले. त्यानंतर ती बेशुद्ध झाल्यावर नरळे याने तिच्यावर अत्याचार केला, तर पत्नी रेणुकाने त्याचे अश्लील व्हिडिओ चित्रीकरण केले.
दुसऱ्या दिवशी शुद्धीवर आल्यानंतर पीडितेला तिच्या सोन्याच्या अंगठ्या, मंगळसूत्र व रोख रक्कम गायब असल्याचे लक्षात आले. त्यानंतर नरळे दाम्पत्याने तिचे अश्लील व्हिडिओ दाखवून बदनामीची धमकी दिली आणि तिला पैशांसाठी ब्लॅकमेल करायला सुरुवात केली. भीतीपोटी महिलेने तब्बल ८ लाख ११ हजार रुपये आरोपीला दिल्याचे तपासात स्पष्ट झाले आहे.
या घटनेची माहिती पीडितेने आपल्या पतीला दिल्यानंतर नागपूर येथील सिताबर्डी पोलिस ठाण्यात तक्रार दाखल करण्यात आली. पुढील तपासासाठी गुन्हा पनवेल शहर पोलिसांकडे वर्ग करण्यात आला असून, पोलिसांनी नरळे याला अटक केली आहे. त्याची पत्नी व भाऊ फरार असून त्यांचा शोध सुरू आहे. पुढील तपास पनवेल शहर पोलिस करत आहेत.