लोहगावमध्ये आमदार बापूसाहेब पठारे यांना मारहाण; वडगावशेरी मतदारसंघात खळबळ
पोलीस महानगर नेटवर्क
पुणे : पुण्यातील वडगावशेरी विधानसभा मतदारसंघाचे विद्यमान आमदार बापूसाहेब पठारे यांना शनिवारी रात्री लोहगाव येथे झालेल्या एका कार्यक्रमादरम्यान मारहाण करण्यात आल्याची धक्कादायक घटना उघडकीस आली आहे. या घटनेनंतर परिसरात मोठी खळबळ उडाली असून पोलिसांनी तातडीने घटनास्थळी धाव घेत परिस्थिती नियंत्रणात आणली आहे.
मिळालेल्या माहितीनुसार, आमदार पठारे हे शनिवारी संध्याकाळी लोहगाव परिसरात आयोजित कार्यक्रमाला उपस्थित होते. या वेळी त्यांचा राष्ट्रवादी काँग्रेस (अजित पवार गट) कार्यकर्त्यांसोबत काही कारणावरून वाद झाला. काही वेळातच वादाचे रूपांतर हाणामारीत झाले आणि आमदार पठारे यांना काही व्यक्तींनी मारहाण केली.
या घटनेत पठारे यांना किरकोळ दुखापत झाल्याचे सांगण्यात आले असून, पोलिसांनी तत्काळ हस्तक्षेप करून परिस्थिती आटोक्यात आणली. या प्रकारामुळे कार्यक्रमस्थळी काही काळ तणावाचे वातावरण निर्माण झाले होते.
आमदार बापूसाहेब पठारे हे महाविकास आघाडीचे एकमेव आमदार असून, राष्ट्रवादी काँग्रेस (शरद पवार गट) यांच्या तिकीटावर ते निवडून आले आहेत. त्यांनी विधानसभेच्या निवडणुकीत राष्ट्रवादी काँग्रेस (अजित पवार गट) चे उमेदवार सुनील टिंगरे यांचा पराभव केला होता.
घटनेनंतर पठारे यांच्या समर्थकांनी मोठ्या संख्येने लोहगाव परिसरात गर्दी केली. समाज माध्यमांवरून मारहाणीची माहिती पसरताच स्थानिक राजकीय वर्तुळात मोठी खळबळ उडाली आहे. पोलिसांनी या प्रकरणाचा सखोल तपास सुरू केला असून, संबंधित आरोपींचा शोध घेतला जात आहे.
या घटनेमुळे वडगावशेरी मतदारसंघातील राजकीय वातावरण अधिक तापण्याची शक्यता व्यक्त केली जात आहे.