खराडीत मसाज पार्लरच्या आड वेश्याव्यवसाय; पोलिसांची धाड, चौघांविरुद्ध गुन्हा
पोलीस महानगर नेटवर्क
पुणे : खराडी परिसरात मसाज पार्लरच्या नावाखाली सुरू असलेल्या वेश्याव्यवसायावर पोलिसांनी कारवाई केली आहे. या धाडीत पोलिसांनी एका महिलेसह चौघांविरुद्ध गुन्हा दाखल केला असून, काही तरुणींना ताब्यात घेण्यात आले आहे.
या प्रकरणी संदीप चव्हाण, रोहित शिंदे, गोपाळ आणि स्वाती उर्फ श्वेता विजय शिंदे अशी आरोपींची नावे असून, चंदननगर पोलीस ठाण्यात पोलीस शिपाई वर्षा सावंत यांनी फिर्याद दाखल केली आहे.
मिळालेल्या माहितीनुसार, चंदननगर-खराडी परिसरातील एका फिटनेस क्लबजवळील इमारतीत आरोपी मसाज पार्लर चालवत होते. तेथे वेश्याव्यवसाय सुरू असल्याची गुप्त माहिती पोलिसांना मिळाली. त्यानंतर बनावट ग्राहकाच्या माध्यमातून खातरजमा करून पोलिसांनी छापा टाकला.
यावेळी पार्लरमधील तरुणींना आरोपींनी जादा पैशांचे आमिष दाखवून वेश्याव्यवसायास प्रवृत्त केल्याचे तपासात समोर आले. वरिष्ठ पोलीस निरीक्षक सीमा ढाकणे या प्रकरणाचा तपास करत आहेत.
शहरात मसाज पार्लरच्या आड गैरप्रकार सुरू असल्याच्या तक्रारी पोलीस आयुक्त अमितेश कुमार यांच्याकडे प्राप्त झाल्यानंतर त्यांनी विशेष कारवाईचे आदेश दिले होते. गेल्या चार दिवसांत पोलिसांनी मार्केट यार्ड, धनकवडी आणि खराडी येथे तीन मसाज पार्लरवर छापे टाकून कारवाई केली असून, संबंधितांविरुद्ध गुन्हे दाखल करण्यात आले आहेत. पुण्यात मसाज पार्लरच्या आड सुरू असलेल्या अशा गैरप्रकारांवर पोलिसांची कारवाई सुरूच राहणार असल्याचे संकेत मिळाले आहेत.