“आरपीआय कार्यकर्ता की गँगस्टर? – विजय निकमला दुसऱ्यांदा अटक”
“झोपडपट्टीकरांच्या जीवाशी खेळणाऱ्या निकमवर परिसर हद्दपारीची मागणी”
मुंबई – कुर्ल्यात झोपडपट्टी धारकांच्या जीवाशी खेळणारा कुख्यात खंडणीखोर विजय निकम पुन्हा पोलिसांच्या जाळ्यात अडकला आहे. आरपीआयचा कार्यकर्ता असल्याचा धाक दाखवत झोपडीधारकांकडून हफ्ते उकळणाऱ्या या इसमाला नेहरू नगर पोलिसांनी दुसऱ्यांदा बेड्या ठोकल्या.
जामिनावर सुटताच खंडणी:
ठक्करबाप्पा कॉलनी, वत्सलाताई नाईक नगर आणि वसंत नगर या भागात रहिवाशांनी दुरुस्ती सुरू केली की निकम हजेरी लावत असे. पहिल्या अटकेनंतर तो जामिनावर सुटला आणि पुन्हा एका घरमालकाकडे पैशांची मागणी करताच पोलिसांना माहिती मिळाली. त्यावरून त्याच्यावर दुसरा गुन्हा दाखल करण्यात आला.
निकमचा टोळीबाजपणा:
निकम एकटा नाही, तर त्याच्या सोबत सुनीता, ओमप्रकाश आणि ‘चिंदीचोर विजय’ हे साथीदारही आहेत. या सर्वांवरही लवकरच खंडणीचे गुन्हे नोंद होणार असल्याची गुप्त माहिती आहे.
स्थानिकांचा संताप:
झोपडपट्टीकरांनी पोलिस प्रशासनाकडे मागणी केली आहे की, “निकमला कायमचा हद्दपार करा, नाहीतर आम्हाला जगणं कठीण होईल!”
नेहरू नगर पोलिसांनी सांगितले, “निकम सराईत गुन्हेगार आहे. त्याच्या टोळीवर आमची कडक नजर आहे. अजूनही त्रास दिल्यास त्याला कायमचा रस्ता दाखवू.”