पनवेलमध्ये जामिनावर असलेल्या आरोपीचा पोलिसांवर कुऱ्हाडीने हल्ला; दोन पोलीस गंभीर जखमी, एक मुलगी ओलीस
योगेश पांडे / वार्ताहर
पनवेल – पनवेलमध्ये एक धक्कादायक घटना घडली आहे. एका खून प्रकरणात जामीनावर सुटलेल्या आरोपीने पोलिसांवर कुऱ्हाडीने हल्ला केल्याची घटना घडली आहे. यामध्ये दोन पोलीस गंभीर जखमी झाले आहेत. तसेच स्वतःच्या भावाच्या १६ वर्षीय मुलीला ओलीस ठेवत तिच्या गळ्यावर कोयता ठेवून धमकी दिल्याचा प्रकार देखील घडला आहे. या घटनेमुळं परिसरात भीतीचं वातावरण आहे. सोबन बाबुलाल महातो असं या आरोपीचं नाव आहे. सोबन महातो याने बुधवारी रात्री पनवेल शहरात चांगलाच कहर माजवला. मंगला निवास इमारत स्वतःच्या मालकीची असल्याचा दावा करत त्याने एका खोलीचे कुलूप तोडून प्रवेश केला तसेच बाहेर पडणार नसल्याची भूमिका घेतली. पोलिसांनी हस्तक्षेप केला असता त्याने कुऱ्हाड आणि कोयत्याने पोलिसांवर हल्ला केला. या झटापटीत दोन पोलीस कर्मचारी गंभीर जखमी झाले आहेत, तर काहींना किरकोळ मार लागला आहे. एवढ्यावरच न थांबता सोबनने स्वतःच्या भावाच्या १६ वर्षीय मुलीला ओलीस ठेवत तिच्या गळ्यावर कोयता ठेवून धमकी दिली. या घटनेने परिसरात भीतीचे वातावरण निर्माण झाले होते.
सोबन बाबुलाल महातो याने इमारत स्वतःची असल्याचा दावा करुन रहिवाशांना धमक्या दिल्या आहेत. पोलिसांनी घटनास्थळी पोहोचताच त्याने कुऱ्हाडीने हल्ला केला. सम्राट डाकी आणि रविंद्र पारधी हे दोन पोलीस गंभीर जखमी झाले आहेत. तर माधव शेवाळे आणि साईनाथ मोकल हे किरकोळ जखमी झाले आहेत. सोबनने घरातील नातेवाईकांना बाहेर येऊ न देता आतच बंदिस्त ठेवले. अखेरीस दीर्घ प्रयत्नांनंतर रात्री उशिरा पोलिसांनी सोबनला अटक केली आहे.