चंदुकाका सराफ यांच्या नावावर जीएसटी सर्टिफिकेटचा गैरवापर; सोन्याच्या दागिन्यांची ठकवणूक करणारा आरोपी अटक, ३१.५८ लाखांचा संपूर्ण माल हस्तगत
मुंबई – एम.आय.डी.सी. पोलिसांनी चंदुकाका सराफ या सुप्रसिद्ध ज्वेलर्सच्या नावावर जीएसटी सर्टिफिकेटचा गैरवापर करून सोन्याचे व हिऱ्याचे दागिने ठकवणाऱ्या आरोपीस अटक केली आहे. पोलिसांच्या माहितीनुसार, आरोपीने आंतरराष्ट्रीय हिरे परिक्षण संस्था मधून बोलत असल्याचे सांगत चंदुकाका सराफ यांचे जीएसटी सर्टिफिकेट फसवणुकीने मिळवले. त्यानंतर स्वतःची खरी ओळख लपवून, तोच चंदुकाका सराफ असल्याचे भासवत, सोन्याचे दागिने तयार करणाऱ्या कंपन्यांकडून नव्या शोरूमसाठी दागिन्यांची ऑर्डर दिली.
या पद्धतीने आरोपीने मनी ज्वेल्स एक्सपर्ट, अंधेरी (पूर्व) येथून २७ लाख रुपये किंमतीचे दागिने बांद्रा येथे रस्त्यावर स्वीकारले. तसेच कलीस्ता ज्वेलर्स, महाकाली केव्हज रोड, अंधेरी (पूर्व) येथून ४.५८ लाख रुपये किंमतीचे दागिने पुण्यात रस्त्यावर घेतले. एकूण ३१.५८ लाख रुपये किंमतीच्या सोन्या-हिऱ्यांच्या दागिन्यांची ठकवणूक झाली. एम.आय.डी.सी. पोलीस ठाण्यात गु.र.क्र. ६३३/२०२५ कलम ३१८(४), ३१९ भा.न्या.सं. २०२३ व गु.र.क्र. ६३१/२०२५ कलम ३१९ भा.न्या.सं. २०२३ अंतर्गत गुन्हे दाखल करण्यात आले होते.
तपासादरम्यान तांत्रिक व डिजिटल माध्यमांतून आरोपीचा ठावठिकाणा शोधून पोलिसांनी त्याला अटक केली. या कारवाईत दोन्ही गुन्ह्यांतील १०० टक्के मालमत्ता पोलिसांनी हस्तगत केली आहे. सदरची कामगिरी पोलीस आयुक्त, बृहन्मुंबई श्री. देवेन भारती, पोलीस सह आयुक्त (कावसु), बृहन्मुंबई श्री. सत्यनारायण, अपर पोलीस आयुक्त, पश्चिम प्रा. विभाग, मुंबई श्री. परमजीत सिंह दहिया, पोलीस उप आयुक्त, परिमंडळ-१०, मुंबई श्री. दत्ता नलावडे, सहायक पोलीस आयुक्त, अंधेरी विभाग, मुंबई श्री. गजानन पवार, यांच्या मार्गदर्शनाखाली वरिष्ठ पोलीस निरीक्षक, एमआयडीसी पोलीस ठाणे, मुंबई श्री. रविंद्र वाणी यांच्या प्रत्यक्ष देखरेखीखाली, गुन्हे प्रकटीकरण अधिकारी सपोनि यश पालवे, पो. ह. नलावडे, पो.शि. जाधव, माळी, पवार, जगताप यांनी यशस्वीरित्या पार पाडली.