तर विदर्भातील परमीट रूम्स बेमुदत बंद; करवाढीविरोधात बारचालक आक्रमक
पोलीस महानगर नेटवर्क
अमरावती : राज्य शासनाच्या अन्यायकारक कर धोरणाविरोधात विदर्भातील बारचालकांनी बेमुदत संपाचा इशारा दिला असून परमीट रूम्स बंद ठेवल्याने हॉटेल व्यवसायावर मोठे संकट ओढवले आहे. मद्य विक्रीवरील मूल्यवर्धित कर (व्हॅट) वाढ, परवाना शुल्क वाढ आणि आयएमएफएलवरील (भारतीय बनावटीच्या परदेशी मद्यावरील) उत्पादन शुल्कवाढ यामुळे बार चालकांना व्यवसाय करणे परवडत नसल्याचे स्पष्ट करण्यात आले. अमरावती परमीट रूम असोसिएशनचे अध्यक्ष नितीन मोहोड यांनी दिलेल्या माहितीनुसार, शासनाने व्हॅट ५ टक्क्यांवरून १० टक्के केला असून हा वाढीव कर केवळ बार चालकांवर लादण्यात आला आहे. त्याचबरोबर परवाना शुल्कात १५ टक्के वाढ आणि आयएमएफएलवर तब्बल ६० टक्क्यांची उत्पादन शुल्कवाढ करण्यात आली आहे. या करवाढीमुळे अमरावती जिल्ह्यातील ४०० बार बंद पडण्याच्या मार्गावर असून त्यावर अवलंबून असलेल्या १५ हजार कुटुंबांवर उपासमारीची वेळ येणार असल्याचे मोहोड यांनी सांगितले.
नागपूर येथे नुकत्याच झालेल्या जिल्हा परमीट रूम असोसिएशनच्या बैठकीत या मुद्यावर तीव्र संताप व्यक्त करण्यात आला. सरकारकडे तसेच उपमुख्यमंत्री अजित पवार यांना निवेदने देऊनही व्हॅट रद्द करण्यात आला नसल्याने बारचालक आक्रमक झाले आहेत.
वाईन शॉप व देशी दारूची विक्री वाढली
बारमध्ये करवाढ झाल्यामुळे ग्राहकांनी वाईन शॉपमधून थेट बाटल्या खरेदी करून रस्त्यावर, धाब्यांवर, हातगाड्यांवर मद्यपान करण्यास सुरुवात केली आहे. परिणामी वाईन शॉपची विक्री तिपटीने, तर देशी दारूची विक्री सुमारे २० टक्क्यांनी वाढली आहे. याशिवाय नकली दारू, हातभट्टी आणि परराज्यातून तस्करी होणाऱ्या दारूचा महापूर आलेला असल्याचे मोहोड यांनी निदर्शनास आणले.
हॉटेल व्यवसाय डबघाईस
उच्च करामुळे परमीट रूम्स चालवणे अशक्य झाले असून कर्मचाऱ्यांची कपात सुरू झाली आहे. हातभट्टी व नकली दारूमुळे अपघात किंवा दुर्घटना घडल्यास त्यास सरकार व प्रशासन जबाबदार राहील, असा इशारा असोसिएशनने दिला आहे. उत्पादन शुल्क विभाग व पोलिसांकडून कारवाई होऊनही खुल्या ठिकाणी मद्यसेवन सुरूच असल्याचे सांगून, गेल्या दोन महिन्यांचा आढावा घेतल्यास सरकारलाच हे संकट स्पष्ट दिसेल, असेही मोहोड यांनी स्पष्ट केले. नागपूर येथील बैठकीस राजीव जयस्वाल, किशोर धारड, परविंदर सिंग भाटिया, पवनीकर, राऊत आदी पदाधिकारी उपस्थित होते.