सुनील तटकरे यांचा निकटवर्तीय निघाला सायबर भामटा
पुण्यात ज्येष्ठ नागरिकाची ६ कोटींची फसवणूक; पुणे पोलिसांनी पनवेलमधून ठोकल्या बेड्या
योगेश पांडे / वार्ताहर
पुणे – देशभरात सायबर फ्रॉडचं प्रमाण दिवसेंदिवस वाढत आहे. दररोज नवीन क्लुप्त्या वापरून हे सायबर भामटे सर्वसामान्यांना गंडा घालत असतात. सर्वसाधारणपणे हे भामटे परराज्यातले किंवा परदेशातील असतात. मात्र पुण्यातील एका अशाच सायबर चोरी संदर्भात घडलेल्या गुन्ह्यामध्ये एका राजकीय पक्षाशी निगडित असणारा भामटा पुणे पोलिसांनी जेरबंद केला आहे. तुषार हरिश्चंद्र वाजंत्री (२८) असे या सायबर भामट्याचे नाव आहे. मनी लाँड्रिग व्यवहारात डिजिटल अटक करण्याची भीती दाखवून पुण्यातील एका ज्येष्ठ नागरिकाची याने सहा कोटी २९ लाखांची फसवणूक केली होती. याप्रकरणी सायबर चोरट्याला पनवेल परिसरातून अटक करण्यात आली असून त्याला पाच दिवसांची पोलीस कोठडी सुनावण्यात आली आहे.
या वाजंत्रीने फक्त एकाच नाही तर डिजिटल अटकेची भीती दाखवून पाच जणांची फसवणूक केल्याचं तपासात निष्पत्र झालं आहे. आरोपी बांधकाम व्यावसायिक आहे. इतकंच नाही तर तो राष्ट्रवादी काँग्रेसचे प्रदेशाध्यक्ष सुनील तटकरे यांचा निकटवर्तीय असून त्याची पत्नी राष्ट्रवादीची कार्यकता असून ती गावची सरपंच देखील आहे. वाजंत्रीने पुण्यातील एका ज्येष्ठ नागरिकाच्या मोबाइल क्रमांकावर संपर्क साधून पोलीस असल्याची बतावणी केली. मनी लाँन्ड्रिंग प्रकरणी कारवाईची भीती दाखवून ज्येष्ठाला तातडीने पैसे पाठवण्यास सांगितले. त्यानंतर १ ते १९ नोव्हेंबर दरम्यान फसवणूक झालेल्या जेष्ठ व्यक्तीने वाजंत्री याच्या बँक खात्यात सहा कोटी २९ लाख रुपये जमा केले. मात्र, आपली फसवणूक झाल्याचे लक्षात आल्यानंतर शिवाजीनगर सायबर पोलीस ठाण्यात तक्रार दिली. सायबर पोलिसांना ती रक्कम वाजंत्रीच्या खात्यात जमा झाल्याचे उघडकीस आले.
सायबर चोरीतून मिळालेल्या पैशांपैकी त्याने त्यातील ९० लाख आणि २० लाख रुपये एका बँकेत मुदतठेव स्वरूपात ठेवले होते. ज्या खात्यात हे पैसे ठेवण्यात आले होते ते बँक खाते कोकबन येथील धावीर कन्स्ट्रक्शनचे असल्याचे तपासात उघड झाले. त्यानंतर सायबर पोलिसांचे पथक आरोपी आणि साथीदाराला ताब्यात घेण्यासाठी कोकबन येथे पोहचले. पण राजकीय संबंध असलेल्या वाजंत्री याला पोलिसांची चाहूल लगेच लागली. पोलीस येत आहेत हे कळताच तो तिथून फरार झाला. पुणे पोलिसांना तुषार वाजंत्री पनवेलमध्ये असल्याची माहिती एका खबऱ्याने दिली. त्यातूनच पुणे पोलिसांनी सापळा लावून त्याला ताब्यात घेतले. त्याच्या साथीदारांचा शोध सुरू असल्याची माहिती पोलिसांनी दिली आहे. तर सायबर चोरीच्या गुन्ह्यामध्ये केरळ पोलीस सुद्धा या वाजंत्रीच्या मागावर होते. पुणे पोलिसांनी केरळ पोलिसांची संपर्क साधला आहे. या वाजंत्रीच्या विरोधात नॅशनल सायबर पोर्टलवर वेगवेगळ्या राज्यातून पाच तक्रारी दाखल आहेत.