चिंचवडमध्ये चालकाचं नियंत्रण सुटून डंपर पलटली; दोन तरुणींचा जागीच मृत्यू
योगेश पांडे/वार्ताहर
पिंपरी – चिंचवड शहरातून एक अपघाताची धक्कादायक घटना समोर आली आहे. हिंजवडी माण रस्त्यावरील वडजाई नगर कॉर्नर येथे वेगात असलेला रेडमिक्स डंपर पलटी होऊन भीषण अपघात झाला. या अपघातात दोन तरुणींचा जागीच मृत्यू झाला आहे. शुक्रवारी दुपारच्या सुमारास ही घटना घडली आहे. या घटनेने परिसरात एकच खळबळ उडाली. मिळालेल्या माहितीनुसार अशी हिंजवडीकडून रेडिमिक्सने भरलेला डंपर एमएच १२/एक्सएल ५७४४ हा महाळुंगेच्या दिशेला चालला होता. वडजाई नगर कॉर्नर परिसरात आल्यानंतर डंपर वळण घेत असताना चालकाचा वाहनावरील ताबा सुटला आणि तो पलटी झाला. त्याचवेळी तिथून स्कूटरवर दोन तरुणी चालल्या होत्या. त्या दोघी त्यांच्या स्कूटरसह डंपरखाली चिरडल्या गेल्या. यात त्यांचा जागेवरच मृत्यू झाला आहे.
घटनेची माहिती मिळताच हिंजवडी पोलीस घटनास्थळी पोहचले असून, क्रेनच्या साहाय्याने रेडिमिक्स डंपर उचलून त्याखाली आलेल्या दोन तरुणींना बाहेर काढण्याचं काम सुरू करण्यात आलं. सध्या त्या दोन तरुणींची ओळख पटवण्याचं काम सुरू आहे. या दोन्ही तरुणी आयटी अभियंता असल्याचा प्राथमिक अंदाज व्यक्त केला जात आहे. दुचाकीवरून दोघी चालल्या असताना काळाने घाला घातला. दोघींच्या दुर्दैवी मृत्यूने परिसरात एकच खळबळ उडाली आहे. तसंच नागरिकांमधून या घटनेनंतर संताप व्यक्त केला जात आहे. पुणे आणि पिंपरी चिंचवडमध्ये अपघाताच्या घटनांमध्ये सतत वाढ होत आहे. राज्यभरात नववर्ष सुरू होऊन एक महिनादेखील झाला नसून आतापर्यंत शेकडोंच्या संख्येने अपघात होत यात अनेकांना जीव गमवावा लागला आहे. अपघातात अनेक व्यक्तींना आपले प्राण गमवावे लागले आहेत. शुक्रवारी झालेल्या अपघातात निरापाराध असलेल्या दोन तरुणींना आपले प्राण गमावावे लागले. या घटनेने घाटनास्थळी नागरिकांची एकच गर्दी झाली होती. अंगावर शहारे आणणाऱ्या या घटनेने हळहळ व्यक्त केली जात आहे.