वाशिमच्या कारंजा-पोहा रोडवर ऑटो आणि पिकअप गाडीचा भीषण अपघात; तिघांचा जागीच मृत्यू, १२ गंभीर जखमी
योगेश पांडे/वार्ताहर
वाशिम – वाशिमच्या कारंजा तालुक्यातील कारंजा पोहा रोडवरील तुळजापूर धरणाजवळ ऑटो रिक्षा आणि पिकअप गाडी यांच्यात समोरासमोर जोरदार धडक झाली. या भीषण अपघातामध्ये तीन जणांचा जागीच मृत्यू झाला आहे. तर, १२ जण गंभीर जखमी असल्याची माहिती मिळाली आहे. जखमींपैकी तर काहींची प्रकृती चिंताजनक असल्याची माहिती आहे. अपघातातील जखमींना त्वरित उपचारासाठी कारंजा येथील रुग्णालयात हलवण्यात आलं आहे. हा अपघात एवढा भीषण होता यामध्ये दोन्ही गाड्यांचा अक्षरशः चुराडा झाला आहे. हा अपघात कारंजा वरुन पोहा गावाकडे जाताना घडला आहे. घटनास्थळी पोलिसांनी पंचनामा केला असून अधिकचा तपास कारंजा ग्रामीण पोलीस करीत आहे. तुळजापूर धरणाजवळ हा अपघात झाला. ज्यामध्ये ऑटो रिक्षा आणि पिकअप गाडी यांच्यात भीषण अपघात झाला. ऑटोमध्ये प्रवासी संख्या क्षमतेपेक्षा अधिक असल्याने जखमी आणि मृतांचा आकडा वाढल्याचं सांगितलं जात आहे. भरधाव वेगात येणाऱ्या पिकअपने ऑटो रिक्षाला धडक दिली. मागून येणारी मालवाहू रिक्षाही या पिकअपला धडकली. या अपघातात तिघांचा जागीच मृत्यू झाला तर १२ जण जखमी झाले आहेत. त्यांच्यावर सध्या रुग्णालयात उपचार सुरु आहेत.
मंगळवारी मध्यरात्रीच्या सुमारास हा अपघात घडल्याची माहिती आहे. कारंजा-पोहा मार्गावर भरधाव वेगात येत असलेल्या पिकअप वाहनाने विरुद्ध दिशेने जाणाऱ्या रिक्षाला जोरदार धडक दिली. यादरम्यान या रिक्षाच्या मागून आणखी एक रिक्षा आली आणि तिही या पिकअपला येऊन धडकली. या भीषण अपघातात तिघांचा जागीच मृत्यू झाला. तर, १२ जण गंभीर जखमी झाले. अपघाताची माहिती मिळताच पोलीस तात्काळ घटनास्थळी दाखल झाले. तोपर्यंत स्थानिकांनी जखमींना तातडीने कारंजा ग्रामीण रुग्णालयात नेलं. या अपघातामुळे परिसरात एकच खळबळ माजली होती. याप्रकरणी पोलिसांनी पंचनामा करुन मृतदेह ताब्यात घेत शवविच्छेदनासाठी पाठवले. सध्या पोलीस या प्रकरणाचा तपास करत आहेत.