प्रयागराजच्या महाकुंभ मेळ्यात भीषण अग्नितांडव; तंबूमध्ये ठेवलेल्या गैस सिलिंडरमध्ये स्फोट. सहा गाड्यांच्या मदतीनं आगीवर नियंत्रण
योगेश पांडे/वार्ताहर
प्रयागराज – प्रयागराजमधून मोठी बातमी समोर आली आहे. महाकुंभ मेळ्यात भीषण आग लागली आहे. अग्निशमन दलाच्या सहा वाहनातून आगीवर नियंत्रण मिळवण्यात यश. सिलिंडरचा स्फोट झाला आणि त्यानंतर ही आग लागल्याची बातमी सोमर येत आहेत. घटनेबाबत मिळालेल्या माहितीनुसार प्रयागराजमध्ये महाकुंभ मेळावा सुरू आहे. महाकुंभ मेळ्याच्या सेक्टर पाचमध्ये ही भीषण आग लागली. समोर आलेल्या माहितीनुसार एका तंबूमध्ये ठेवलेल्या सिलिंडरचा स्फोट झाला. त्यानंतर ही भीषण आग लागली. या आगीत २० ते २५ तंबू जळून खाक झाले आहेत. घटनेची माहिती मिळताच तातडीनं अग्निशमन दलाच्या गाड्या घटनास्थळी दाखल झाल्या आणी सहा गाड्यांच्या मदतीनं आगीवर नियंत्रण मिळवण्यात आले. एनडीआरएफ आणि पोलीस दलाचं पथक देखील तातणीने घटनास्थळी दाखल झाले आणि ज्या ठिकाणी आग लागली तेथील सर्व परिसर खाली करण्यात व नागरिकांना सुरक्षितस्थळी हालवण्यात आलं.
ही आग प्रयागराजमधील शास्त्री पूल आणि रेल्वे पुलाच्यामध्ये लागली होती. हा सर्व परिसर महाकुंभ मेळा क्षेत्रात येतो. आगीनं रौद्र रूप धारण केलं. त्या ठिकाणी तंबूमध्ये अनेक सिलिंडर ठेवण्यात आले होते, या सिलिंडरचा एका मागून एक असा स्फोट होत असल्यामुळे आग आधिकच भडकली. अचानक आग लागल्यामुळे महाकुंभ मेळ्यावत चांगलाच गोंधळ उडाला, लोकांनी सुरक्षित जागी स्थलांतर केले. दरम्यान या आगीमध्ये मोठी वित्तहानी झाली आहे, मात्र कोणतीही जीवितहानी झाली नसल्याची बातमी समोर आली आहे. ज्या ठिकाणी आग लागली त्या ठिकाणी हवा देखील अधिक वेगानं वाहत होते , त्यामुळे आग अधिकच भडकली. त्यातच तंबूत ठेवलेल्या सिलिंडरचा एका मागून एक स्फोट होत असल्यानं आग पसरत राहिली. अग्निशमन दलाकडून आगीवर नियंत्रण मिळवण्यात यश आले.