डोंबिवलीतील धक्कादायक घटना ! सरबतामधून गुंगीचं औषध देत महिलेवर अत्याचार
पोलीस महानगर नेटवर्क
डोंबिवली – राज्यात दिवसेंदिवस मुली व महिलांवर अत्याचाराच्या घटना घडत आहेत. महिलांना असुरक्षित वाटत असताना समाजामध्ये महिला सुरक्षित आहेत का असा प्रश्न डोंबिवलीतील घटनेने पुन्हा निर्माण झाला आहे. डोंबिवलीमध्ये धक्कादायक घटना समोर आली आहे. एका २३ वर्षीय तरुणीला गुंगीचं औषधं देत तिच्या मनाविरुद्ध शारीरिक संबंध ठेवल्याचा प्रकार उघडकीस आला आहे. या घटनेनंतर परिसरात संताप व्यक्त केला जात आहे. तरुणीला गुंगीचं औषधं देत तिच्या मनाविरुद्ध संबंध प्रस्थापित करणाऱ्या डोंबिवलीमधील प्रवीण पान्हेरकर (४२) याच्या विरोधात पीडित महिलेने विष्णूनगर पोलिस ठाण्यात तक्रार दाखल केली आहे. दरम्यान पोलिसांनी त्वरित गुन्हा नोंदवून आरोपीला अटक केली आहे. फेब्रुवारी ते नोव्हेंबर या ९ महिन्यांच्या कालावधीत व्यक्तीने आपल्यावर लैंगिक अत्याचार केल्याचा आरोप पीडित महिलेने तक्रारीत केला आहे.
याबाबत अधिक माहिती अशी की, प्रवीण याने पीडित तरुणीला नाष्टा खाऊ घातला. त्या नाष्ट्यात गुंगीचं औषधं टाकून सरबत पिण्यास दिलं. त्यानंतर संबंधिताने महिलेच्या मनाविरुध्द लैंगिक अत्याचार केले. तसेच तिचे फोटो – व्हिडिओ मोबाईलमध्ये काढून नंतर ते समाज माध्यमांवर व्हायरल करण्याची धमकी दिली. सततच्या लैंगिक अत्याचारामुळे महिला गर्भवती राहिली. यानंतर ही माहिती कोणालाही सांगू नकोस, नाहीतर तुझ्या आई-वडिलांना मी मारून टाकीन, अशीही त्याने महिलेला धमकी दिल्याचे पीडित महिलेने तिच्या तक्रारीत म्हटले आहे. सदर आरोपीची यापूर्वी दोन लग्न झालेली असल्याची माहिती देखील त्याने पीडितेपासून लपवून ठेवली होती. हा प्रकार पीडितेच्या लक्षात आल्यावर आपली फसवणूक झाल्याचं तिच्या लक्षात आल्याने तिने पोलीस ठाणे गाठले. त्याशिवाय गर्भपाताच्या नावाने आपल्याकडून तीन लाख रुपये टप्या-टप्प्याने उकळल्याचा आरोपही पीडितेने तिच्या तक्रारीत केला आहे.
विष्णूनगर पोलीस ठाण्याचे वरिष्ठ पोलिस निरीक्षक संजय पवार यांनी सांगितले, की दोन दिवसांपूर्वी तक्रारदार महिलेने दिलेल्या फिर्यादीनुसार गुन्हा दाखल केला आहे. त्यानुसार प्रवीण पान्हेरकर (४२) या आरोपीला अटक करण्यात आली आहे. त्याला कल्याण न्यायालयात हजर केले असता न्यायालयाने आरोपीला अधिक चौकशीसाठी दोन दिवस पोलीस कोठडीत ठेवण्याचे आदेश दिले असल्याचे वरिष्ठ पोलिस निरीक्षक पवार यांनी सांगितले. या प्रकरणी सहाय्यक पोलिस निरीक्षक एस. ए. लोखंडे अधिक तपास करत आहेत.