अंधेरीमध्ये वाहनावर कारवाई केल्याच्या रागातून दोन तरूणांची पोलिसाला धक्काबुक्की, पोलीस ठाण्यात गुन्हा दाखल
पोलीस महानगर नेटवर्क
मुंबई – अंधेरी परिसरात रस्त्याच्या कडेला नियमबाह्य पद्धतीने उभ्या केलेल्या वाहनावर कारवाई केल्याच्या रागातून दोन तरूणांनी पोलिसाला धक्काबुक्की केल्याचा प्रकार घडला आहे. याप्रकरणी दोन्ही आरोपींविरोधात अंधेरीतील डी. एन.नगर पोलिसांनी गुन्हा दाखल केला असून त्यासमध्ये त्याच्याविरोधात सरकारी कामात अडथळा निर्माण करणे, पोलिसासोबत वाद घालणे आदी विविध कलमांतर्गत गुन्हा दाखल करण्यात आला आहे.
सदर घटना अंधेरीमधील जे. पी. रोड, स्पोर्टस् कॉम्प्लेक्स, वाडिया महाविद्यालयाजवळ घडली. पोलीस शिवाई प्रमोद बाबासाहेब पालवे डी. एन. नगर पोलीस ठाण्यात कार्यरत आहेत. वाडिया हायस्कूलजवळ काही वाहने बेकायदेशीरपणे उभी करण्यात आली होती. या वाहनांमुळे वाहतुकीस अडथळा निर्माण होत होता. त्यामुळे प्रमोद पालवे यांनी तेथे उपस्थित वाहनचालक सचिन यादव आणि प्रकाश हालीकडे यांना तेथून वाहने काढण्यास सांगितले. यावरून सचिन आणि प्रकाशने पालवे यांच्याशी वाद घातला. तसेच त्यांना धक्काबुक्कीही करीत सरकारी कामात अडथळा आणण्याचा प्रयत्न केला. याप्रकरणी पालवे यांच्या तक्रारीवरून पोलिसांनी दोन्ही आरोपींविरुद्ध गुन्हा दाखल करण्यात आला असून पोलीस याप्रकरणी अधिक तपास करीत आहेत.