पतीचं सैतानी कृत्य; इंजिनिअर पत्नीवर मित्रांकरवी अत्याचार, व्हिडीओही काढला, पतीसह चौघांविरोधात गुन्हा
पोलीस महानगर नेटवर्क
पिंपरी-चिंचवडमध्ये सॉफ्टवेअर इंजिनिअर महिलेवर पतीसह मित्रांनी लैंगिक अत्याचार केल्याची धक्कादायक घटना समोर आली आहे. पीडित महिलेने याप्रकरणी रावेत पोलिस ठाण्यात तक्रार दाखल केली आहे. पिंपरी-चिंचवड शहरातील पुनावळे या ठिकाणी ही धक्कादायक घटना घडली आहे. महिलेच्या पतीसह ४ जणांविरोधात रावेत पोलिस ठाण्यात गुन्हा दाखल करण्यात आला आहे. याप्रकरणी पोलिसांकडून अद्याप अटक करण्यात आली आहे. पोलिस याप्रकरणाचा तपास करत आहेत. राज्यात महिलांविरोधातील अत्याचाराच्या घटनांमध्ये दिवसेंदिवस वाढच होत चालली आहे. अशा अनेक घटना गेल्या काही दिवसांत कानावर येत आहेत. पण, पिंपरी चिंचवडमध्ये तर एका महिलेचा तिच्या नवऱ्यानेच विश्वासघात करत तिला भयंकर त्रास दिला.
मिळालेल्या माहितीनुसार, पीडित महिला सॉफ्टवेअर इंजिनिअर ( ३० वर्ष) असून ती विवाहीत आहे. ती पतीसह पुनावळे परिसरात राहते. महत्वाची गोष्ट म्हणजे पीडित महिलेसह तिचा पती आणि सर्व आरोपी उच्चशिक्षित असून एका मोठ्या कंपनीत काम करतात. पीडित महिलेवर तिघांनी वेगवेगळ्या दिवशी लैंगिक अत्याचार केला, धक्कादायक गोष्ट म्हणजे तिच्या पतीनेच त्या तिघांकडून आपल्या पत्नीवर लैंगिक अत्याचार करवून घेतला. घृणास्पद गोष्ट म्हणजे त्याने या संपूर्ण अत्याचाराच्या क्षणांचे व्हिडीओ शूटिंग मोबाईलमध्ये केलं, असा आरोप तक्रारदार महिलेने केला आहे.
त्यानंतरही तिच्या पतीला दया आली नाही, उलट त्याने त्याच्या पत्नीला हे अत्याचाराचे व्हिडीओ व्हायरल करण्याची धमकी दिली आणि त्यानंतर पत्नीसोबत अनैसर्गिक कृत्यही केलं. सप्टेंबर २०२३ ते ६ एप्रिल २०२४ या आठ महिन्यांच्या कालावधीत पीडितेसोबत हा सर्व प्रकार घडला. त्या महिलेने पतीला विरोध केला असता, त्याने तिला शिवीगाळही केली. पती-पत्नीमध्ये बरेच वाद सुरू आहेत. अखेर त्या महिलेने रावेत पोलीस स्टेशनमध्ये धाव घेत घडलेला सर्व प्रकार कथन केला आणि पती व त्या तिघांविरोधात तक्रार दाखल केली. त्या महिलेच्या फिर्यादीनंतर पोलिसांनी तिच्या पतीसह एकूण चार जणांविरोधात लैंगिक अत्याचाराचा गुन्हा दाखल केला आहे. याप्रकरणी पुढील तपास सुरू आहे