पुण्यात लग्नाचे आमिष दाखवत तरुणीवर ५ वर्ष बलात्कार, तरुणाविरोधात कोंढवा पोलीस ठाण्यात गुन्हा दाखल
पोलीस महानगर नेटवर्क
पुणे – राज्यात दिवसेंदिवस महिला व मुलींवर अत्याचारांच्या घटना मोठ्या प्रमाणात घडत आहेत. कायद्याचा धाक राहिला नसल्याचे यावरून दिसून येत आहे. घटनेत लक्षणीय वाढ झाली आहे. अशीच एक घटना पुण्यातून समोर येत आहे. विवाह नोंदणी संकेतस्थळावरून झालेल्या ओळखीतून तरुणीवर तब्बल पाच वर्ष अत्याचार करण्यात आल्याची घटना उघडकीस आली. याप्रकरणी पीडित महिलेने कोंढवा पोलिसांत आरोपीविरोधात गुन्हा दाखल केला. या घटनेने परिसरात एकच खळबळ उडाली आहे. रचित संतोष गोयल (वय, ३४) असे आरोपीचे नाव असून तो घोरपडी येथील कवडे रस्ता येथील रहिवासी आहे.
पोलिसांनी दिलेल्या माहितीनुसार, एका विवाह नोंदणी संकेतस्थळावर पीडित महिलेची आरोपीशी ओळख झाली. त्यानंतर आरोपी आणि पीडिता यांच्यातील जवळीक वाढली. पुढे आरोपीने पीडिताला लग्नाचे आमिष दाखवून तिच्यावर अनेकदा बलात्कार केला. पीडिता गर्भवती राहिल्यानंतर आरोपीने तिला गर्भपात करण्यास भाग पाडले. त्यानंतर पुन्हा तिच्यासोबत शाररिक संबंध ठेवण्याचा प्रयत्न केला. पीडिताने नकार दिल्यानंतर आरोपीने तिचे अश्लील फोटो आणि व्हिडिओ सोशल मीडियावर व्हायरल
करण्याची धमकी दिली. हा संपूर्ण प्रकार एप्रिल २०१८ ते डिसेंबर २०२३ दरम्यान घडला. सदर आरोपीने तो विवाहित असल्याची बाब पीडित महिलेपासून लपवून विवाह नोंदणी संकेतस्थळावर नाव नोंदवले. पोलीस याप्रकरणी अधिक तपास करीत आहेत.