कल्याण परिसरात चोरांचा सुळसुळाट, एकाच रात्री ४ दुकाने, बार व घर लुटले; पोलिसांकडून शोध सुरू
पोलीस महानगर नेटवर्क
कल्याण – कल्याण परिसरात गुन्हेगारीचे प्रमाण दिवसेंदिवस वाढत चालले आहे. शहरात चैन स्नाचिंग, घरफोडी, मारामारी, महिलांवर अत्याचार वाढत असून पोलिसांची भीती या गुन्हेगारांना राहिली नाही अशी प्रतिक्रिया नागरिकांकडून येत आहेत. कल्याण परिसरात अनेक महिन्यांपासून चोरांचा सुळसुळाट पसरला असून त्याचा फटका सामान्य नागरिक, दुकानदारांना बसत आहे. बुधवारी मद्यरात्री कल्याणमध्ये चोरांनी धुमाकूळ घालत एकाच रात्री चार दुकानं, एक बार एक घर लुटून लाखो रुपयांचा माल लंपास केला. चोरीची ही घटना सीसीटीव्हीत कैद झाली असून त्यामुळे व्यापारी व नागरिकांमध्ये भीतीचे वातावरण निर्माण झाले आहे. कोळसेवाडी पोलिसानी याप्रकरणी तपास सुरू केला असून चोरांचा शोध घेतला जात आहे.
कल्याण पूर्वेतील कोळसेवाडी पोलिस ठाणे हद्दीतील गणेशवाडी, मच्छिमार्केटच्या वर्दळ असलेल्या मुख्य रस्त्यावरील चोरट्यांनी एका बारसह अनेक दुकानांची शटर्स तोडून मुद्देमाल आणि रोख रक्कम लंपास केली. बुधवारी मध्यरात्री हा धक्कादायक प्रकार घडला आहे. बुधवारी मध्यरात्री कल्याण परिसर साखर झोपेत असताना २ ते ३ च्या सुमारास गणेश वाडीतील अमृत पॅलेस बार,अन्नपूर्णा मालवणी स्टोअर्स, पानेरी हे कपड्यांचे दुकान, केअर अँड कॅअर, मेडीकल स्टोअर्स, या दुकानांमध्ये चोरटे शिरून त्यांनी चोरी केली तसेच एका निवासी घरात घुसूनही चोरट्यांनी घरातील सामान, दागिने लुटून पोबारा केला. ही घरफोडी करत चोरांनी एक लाख रुपयांहून अधिक किमतीची रोकड व मौल्यवान वस्तू लंपास केल्या. चोरीची ही संपूर्ण घटना सीसीटीव्हीमध्ये कैद झाली आहे.
या प्रकरणी कोळसेवाडी पोलीस ठाण्यात गुन्हा दाखल करण्यात आला आहे. मात्र एकाच रात्री जवळपास ६ ठिकाणी खुलेआम चोरी झाल्याने कायदा सुव्यवस्थेचा प्रश्न ऐरणीवर आला आहे. चोरांनी एकाप्रकारे पोलिसांना खुले आव्हान दिले असून परिसरातील रहिवासी व व्यापारी वर्गामध्ये भीतीचे वातावरण पसरले आहे. कोळसेवाडी पोलिसांनी गुन्हेगारांचे हे आव्हान मोडून काढले पाहिजे अशी प्रतिक्रिया नागरिकांनी दैनिक ‘पोलीस महानगर’ शी बोलताना व्यक्त केली.