“कॉकरोच जनता पार्टी”ची सोशल मीडियावर चर्चा; मुख्य न्यायमूर्तींच्या वक्तव्यावरून नेटकऱ्यांची उपरोधिक प्रतिक्रिया
पोलीस महानगर नेटवर्क
नवी दिल्ली : देशातील काही तरुणांच्या वर्तनावर भाष्य करताना भारताचे मुख्य न्यायमूर्ती सूर्यकांत यांनी केलेल्या एका वक्तव्याची सोशल मीडियावर मोठी चर्चा रंगली आहे. “काही तरुण झुरळांसारखे सर्वत्र पसरले आहेत,” अशा आशयाच्या निरीक्षणानंतर इंटरनेटवर ‘कॉकरोच जनता पार्टी’ (CJP) नावाचा काल्पनिक राजकीय पक्षच जन्माला आल्याचे चित्र दिसत आहे.
या वक्तव्याचा संदर्भ घेत अनेक नेटकऱ्यांनी उपरोधिक पोस्ट, मीम्स, व्हिडीओ आणि व्यंगचित्रांच्या माध्यमातून प्रतिक्रिया देण्यास सुरुवात केली. काही तासांतच ‘कॉकरोच जनता पार्टी’ हा शब्दप्रयोग सोशल मीडिया प्लॅटफॉर्मवर ट्रेंड होऊ लागला. “आम्ही सर्वसामान्य, टिकाऊ आणि सर्व परिस्थितीत जिवंत राहणारे,” अशा आशयाच्या पोस्ट करत अनेकांनी स्वतःला या काल्पनिक पक्षाचे समर्थक घोषित केले.
विशेष म्हणजे, या कथित पक्षासाठी नेटकऱ्यांनी घोषणापत्र, चिन्ह, पक्षगीत आणि प्रचार मोहिमाही तयार केल्याचे दिसून आले. “घराघरात पोहोचलेला एकमेव पक्ष”, “रात्री अधिक सक्रिय” किंवा “सिस्टम काहीही करो, आम्ही टिकणारच,” अशा उपरोधिक घोषणांमुळे सोशल मीडियावर विनोदांचा अक्षरशः पाऊस पडला आहे. काहींनी तर झुरळाचे चिन्ह असलेले डिजिटल पोस्टर तयार करून “कॉकरोच जनता पार्टीला मतदान करा” अशी काल्पनिक मोहीमही सुरू केली.
दरम्यान, काही सामाजिक आणि राजकीय विश्लेषकांनी या ट्रेंडकडे केवळ विनोद म्हणून न पाहता, तरुणांमधील असंतोष आणि सत्ताधारी तसेच न्यायव्यवस्थेबद्दल वाढत चाललेल्या अविश्वासाचे प्रतीक म्हणून पाहण्याची गरज व्यक्त केली आहे. सार्वजनिक पदावरील व्यक्तींनी वापरलेल्या शब्दांचा समाजावर आणि विशेषतः तरुणांवर परिणाम होत असतो. त्यामुळे अशा वक्तव्यांमधील संवेदनशीलता महत्त्वाची असल्याचे मतही व्यक्त होत आहे.
सोशल मीडियावरील चर्चेत काहींनी मुख्य न्यायमूर्तींच्या वक्तव्याचा गैरसमज केला जात असल्याचा दावा केला. “वक्तव्याचा संदर्भ वेगळा होता, मात्र सोशल मीडियावर त्याचे अतिरंजित रूप तयार करण्यात आले,” असे मत काही कायदेतज्ज्ञांनी नोंदवले. तरीही, इंटरनेट संस्कृतीनुसार एखाद्या विधानाचे ‘मीम’मध्ये रूपांतर होण्यास वेळ लागत नाही, हे पुन्हा एकदा स्पष्ट झाले.
दरम्यान, ‘कॉकरोच जनता पार्टी’ या नावाने विविध बनावट सोशल मीडिया अकाउंट्स, लोगो आणि प्रचार साहित्यही मोठ्या प्रमाणात व्हायरल होत असून, तरुण वर्गामध्ये या ट्रेंडची मोठी उत्सुकता पाहायला मिळत आहे. काहींनी याला “डिजिटल आंदोलनाचा विनोदी अवतार” असेही संबोधले आहे.