बदलापुरातील विकी वाईन शॉप फोडून मध्यरात्री चोरी; रोख रक्कम, मोबाईल आणि महागड्या दारूच्या बाटल्या लंपास
पोलीस महानगर नेटवर्क
बदलापूर : बदलापूर शहरात मध्यरात्री झालेल्या धाडसी चोरीच्या घटनेमुळे व्यापाऱ्यांमध्ये भीतीचे वातावरण निर्माण झाले आहे. शहरातील प्रसिद्ध विकी वाईन शॉप या दुकानाचे शटर फोडून अज्ञात चोरट्यांनी रोख रक्कम, मोबाईल फोन आणि महागड्या दारूच्या बाटल्या लंपास केल्याची घटना उघडकीस आली आहे.
मिळालेल्या माहितीनुसार, ही घटना मध्यरात्रीच्या सुमारास घडली. चोरट्यांनी प्रथम दुकानाच्या शटरचे कुलूप तोडत आत प्रवेश केला. त्यानंतर दुकानातील कॅश काउंटरमधील रोख रक्कम, दुकानदाराचा मोबाईल फोन तसेच विविध ब्रँडच्या महागड्या मद्याच्या बाटल्या चोरून नेल्या. चोरीची संपूर्ण घटना दुकानातील सीसीटीव्ही कॅमेऱ्यात कैद झाल्याची माहिती समोर येत आहे.
आज सकाळी दुकान उघडण्यासाठी कर्मचारी आल्यानंतर शटर तुटलेल्या अवस्थेत दिसून आले. आत पाहणी केली असता दुकानातील सामान अस्ताव्यस्त पडलेले आढळले आणि चोरीचा प्रकार उघड झाला. घटनेची माहिती तत्काळ पोलिसांना देण्यात आली.
घटनास्थळी पोलिसांनी भेट देत पंचनामा केला असून परिसरातील सीसीटीव्ही फुटेजच्या आधारे आरोपींचा शोध सुरू करण्यात आला आहे. प्राथमिक अंदाजानुसार, चोरट्यांनी काही लाखांचा मुद्देमाल लंपास केल्याची शक्यता व्यक्त केली जात आहे.
या घटनेमुळे बदलापूर परिसरातील व्यापाऱ्यांनी रात्रीच्या सुरक्षेबाबत चिंता व्यक्त केली असून पोलिसांनी गस्त वाढवण्याची मागणी केली आहे. पोलिसांकडून पुढील तपास सुरू आहे.