अशोक खरात याच्या काळ्या कृत्यांचा पसारा ठाण्यापर्यंत!
ठाणे महानगरपालिकेतील वादग्रस्त अधिकारी महेश अहेरचा महिलेला भोंदूबाबाच्या कार्यालयात नेऊन वारंवार अत्याचार
योगेश पांडे / वार्ताहर
ठाणे – नाशिकचा भोंदू बाबा अशोक खरात याच्या काळ्या कृत्यांचा पसारा आता ठाण्यापर्यंत विस्तारल्याचे समोर आले आहे. ठाणे महानगरपालिकेतील वादग्रस्त अधिकारी महेश अहेर हा खरातचा कट्टर भक्त असून, त्याने पालिकेतील एका लिपिक महिलेला खरातच्या जाळ्यात ओढल्याचा खळबळजनक प्रकार उघडकीस आला आहे. या प्रकरणी कासारवडवली पोलीस ठाण्यात गुन्हा दाखल करण्यात आला असून ठाणे गुन्हे शाखा याचा अधिक तपास करत आहे.
तक्रारदार महिलेने दिलेल्या माहितीनुसार, महेश अहेर याने तिला नाशिक येथील अशोक खरातच्या ‘ओकस’ कार्यालयात नेले होते. तिथे त्या महिलेच्या इच्छेविरुद्ध अहेर आणि खरात या दोघांनी तिच्यावरून लिंबू उतरवून अघोरी कृत्य केले. इतकेच नाही तर तिला ‘मोती’ हा खडा घालण्यास सक्ती केली. दैवी शक्तीच्या नावाखाली या महिलेवर मानसिक दडपण आणण्याचा प्रयत्न करण्यात आला.
पीडित महिलेने केलेल्या तक्रारीत अत्यंत गंभीर आरोप केले आहेत. महेश अहेर याने तिला कोल्ड्रिंकमध्ये गुंगीचे औषध देऊन तिच्यावर जबरदस्तीने शरीरसंबंध ठेवले. या कृत्याचा व्हिडीओ बनवून तो सोशल मीडियावर व्हायरल करण्याची धमकी देण्यात आली. या ब्लॅकमेलिंगच्या जोरावर वारंवार अत्याचार करण्यात आल्याचे पीडितेने तक्रारीत म्हटले आहे.
दरम्यान, महेश अहेर हा ठाणे महानगरपालिकेतील अत्यंत वादग्रस्त अधिकारी म्हणून ओळखला जातो. काही काळापूर्वी राष्ट्रवादी काँग्रेस शरद पवार गटाचे आमदार जितेंद्र आव्हाड यांच्या मुलीबाबत चुकीचे वक्तव्य केल्याच्या आरोपावरून आव्हाडांच्या कार्यकर्त्यांनी त्याला पालिका मुख्यालयाबाहेर मारहाण केली होती. या प्रकरणी अनेक कार्यकर्त्यांवर तडीपारीची कारवाई देखील झाली होती. आता थेट एका भोंदू बाबासोबत मिळून महिलेचे शोषण केल्याचा आरोप झाल्याने अहेरच्या अडचणीत मोठी वाढ होण्याची शक्यता आहे.