दुप्पट परताव्याचं आमिष दाखवत ठाण्यातिल बँक अधिकाऱ्यालाच लाखोंचा गंडा; कापूरबावडी पोलिस ठाण्यात गुन्हा दाखल
योगेश पांडे / वार्ताहर
ठाणे – सध्या फसवणुकीच्या अनेक घटना समोर येत आहेत. अशीच एक घटना ठाण्यात घडली आहे. शेअर मार्केटमध्ये पैशाची गुंतवणूक करून जादा परतावा देण्याच्या आमिषाने फसवणूक करण्यात आली आहे. सिया अरोरा ही केचुरा सेक्युरिटीजमध्ये कामाला असल्याचे सांगून ११ लाख ९७ हजारांचा गंडा एका खासगी बँकेत असलेल्या अधिकाऱ्यावर घालण्यात आला. याप्रकरणी संपूर्ण माहिती आमिषाला बळी पडलेले श्रीधर चांदोरकर (३२) यांनी तंत्रज्ञान कायद्यासह फसवणुकीचा गुन्हा दाखल झाल्याची माहिती कापूरबावडी पोलिसांना दिली.
श्रीधर हे ६ नोव्हेंबर २०२५ ला व्हॉटसअप न्याहाळत असताना त्यावेळी एका व्हॉटसअप ग्रुपमध्ये यांना समाविष्ट करण्यात आले. ग्रुपमध्ये नुकतीच ऑनलाइन ट्रेंडिंग इन्व्हेस्टमेंट सुरू होती. याच ग्रुपमधील सिया अरोरा हिने केचुरा सेक्युरिटीजमध्ये कामाला असल्याचे सांगितले. त्यानंतर तिने शेअर्समध्ये ऑनलाइन गुंतवणुकीची माहिती देत एक लिंकही त्यांच्या पर्सनल नंबरवर पाठवली.
शेअर्समध्ये गुंतवणूक केल्यास दुप्पट परतावा मिळेल, असे तिने आमिष दाखवले. याच आमिषाला बळी पडत श्रीधर यांनी बँकांमधून ११ लाख ९७ हजारांची गुंतवणूक केली. त्याव्यतिरिक्तही सिया हिने त्यांना आणखी दहा लाखांची रक्कम दलालीपोटी भरण्यास सांगितले. आणखी रक्कम भरण्यासाठी नसल्याने त्यांनी इतर सदस्यांना कॉल केले. तेव्हा त्यातील एकाही कॉलला त्यांना प्रतिसाद मिळाला नाही.
त्यानंतर त्यांनी ठाण्यातील केचुरा सेक्युरिटीज या कंपनीला भेट दिली. मात्र, आपल्या कंपनीकडून व्हॉटसअपद्वारे कोणतीही माहिती किंवा गुंतवणुकीचे मार्गदर्शन केले जात नसल्याचे या कंपनीकडून त्यांना स्पष्ट करण्यात आले. त्यानंतर आपली फसवणूक झाल्याचे लक्षात आल्यानंतर ३ फेब्रुवारी रोजी त्यांनी सायबर विभागाकडे ऑनलाइन तक्रार केली. तसेच आमिषाला बळी पडलेल्या याप्रकरणी त्यांनी कापूरबावडी पोलिस ठाण्यात फसवणुकीचा गुन्हा दाखल केला. यानंतर संपूर्ण माहिती काढून पोलीस पुढील तपास करत आहेत.