बापाच्या कष्टावर चोरट्यांचा दरोडा!
बुलढाणा पोलिसांची उत्तम कामगिरी; मुलीच्या शिक्षणाचे चोरीला गेलेले ५ लाख रुपये पोलिसांनी कर्नाटकातून शोधून आणले
योगेश पांडे / वार्ताहर
बुलढाणा – “लेक शिकून डॉक्टर व्हावी” हे स्वप्न उराशी बाळगून एका बापाने मोठ्या कष्टाने ५ लाख रुपये जमवले होते. पण, बुलढाण्यात भरदिवसा या रकमेवर चोरट्यांनी डल्ला मारला आणि त्या वडिलांच्या पायाखालची जमीनच सरकली. मात्र, बुलढाणा स्थानिक गुन्हे शाखेने फिल्मी स्टाईलने तपास करत थेट कर्नाटक गाठले आणि चोरट्यांच्या मुसक्या आवळून चोरी गेलेली संपूर्ण रक्कम जप्त केली. पोलिसांनी केवळ पैसेच परत आणले नाहीत, तर त्या मुलीच्या तुटणाऱ्या स्वप्नांना पुन्हा उभारी दिली आहे.
९ सप्टेंबर २०२५ रोजी ही थरारक घटना घडली होती. मेहेकर येथील रहिवासी असलेले हे वडील आपल्या मुलीच्या वैद्यकीय शिक्षणाची फी भरण्यासाठी ५ लाख रुपये घेऊन बुलढाण्यात आले होते. चोरट्यांनी मेहेकरपासूनच त्यांच्यावर पाळत ठेवली होती. बुलढाण्यातील राजश्री शाहू विद्यालयासमोर त्यांनी आपली कार उभी केली आणि काही कामानिमित्त बाहेर गेले. नेमकी हीच संधी साधून पाठलाग करत आलेल्या दोन चोरट्यांनी कारची काच फोडली आणि पैशांची बॅग घेऊन फरार झाले.
मुलीच्या शिक्षणाचे पैसे गेल्याने हताश झालेल्या पित्याने पोलीस ठाणे गाठले. प्रकरणाचे गांभीर्य ओळखून जिल्हा पोलीस अधीक्षक नीलेश तांबे यांनी स्थानिक गुन्हे शाखेला (LCB) तपासाचे आदेश दिले. तांत्रिक विश्लेषण, शेकडो सीसीटीव्ही फुटेजची तपासणी आणि खबऱ्यांकडून मिळालेल्या माहितीच्या आधारे पोलिसांना समजले की, आरोपी थेट कर्नाटक राज्यात पळून गेले आहेत.
स्थानिक गुन्हे शाखेच्या विशेष पथकाने तातडीने कर्नाटक गाठले आणि मोठ्या शिताफीने दोन आरोपींना अटक केली. त्यांच्याकडून चोरीस गेलेले संपूर्ण ५ लाख रुपये हस्तगत करण्यात आले आहेत. आपली चोरी झालेली रक्कम पुन्हा सुखरूप पाहून संबंधित वडिलांच्या डोळ्यांत आनंदाश्रू उभे राहिले. बुलढाणा पोलिसांच्या या तत्परतेमुळे एका मुलीचे डॉक्टर होण्याचे स्वप्न पुन्हा जिवंत झाले असून, संपूर्ण जिल्ह्यात पोलिसांचे कौतुक होत आहे.