चित्रपटासाठी निधी उभारणीच्या नावाखाली दीपक तिजोरी यांची फसवणूक; २.५ लाखांचा आर्थिक गंडा
पोलीस महानगर नेटवर्क
मुंबई : मनोरंजनसृष्टीतून धक्कादायक प्रकार समोर आला असून बॉलिवूड अभिनेता, दिग्दर्शक व चित्रपट निर्माता दीपक तिजोरी यांची फसवणूक झाल्याचे उघड झाले आहे. त्यांच्या आगामी हिंदी चित्रपट ‘टॉम, डिक अँड मेरी’ साठी निधी मिळवून देण्याच्या बहाण्याने दोन महिलांनी २.५ लाख रुपयांचा आर्थिक गंडा घातल्याचा आरोप आहे. या प्रकरणी तिजोरी यांच्या तक्रारीवरून बांगूर नगर पोलीस ठाण्यात गुन्हा दाखल करण्यात आला असून पोलिसांकडून तपास सुरू आहे.
पोलिसांनी दिलेल्या माहितीनुसार, गोरेगाव पश्चिम येथील गार्डनर इस्टेटमध्ये राहणारे दीपक तिजोरी हे १९९० पासून चित्रपटसृष्टीत कार्यरत आहेत. डिसेंबर २०२४ मध्ये त्यांनी ‘टॉम, डिक अँड मेरी’ या चित्रपटाची पटकथा पूर्ण केली होती. या चित्रपटाच्या निर्मितीसाठी सुमारे २५ कोटी रुपयांच्या गुंतवणुकीची आवश्यकता होती.
तक्रारीनुसार, फेब्रुवारी २०२५ च्या पहिल्या आठवड्यात कविता शिबाग कपूर नावाची महिला तिजोरी यांच्या घरी आली होती. तिने स्वतःचा टी-सीरिजशी संबंध असल्याचा तसेच झी नेटवर्क आणि मीडिया क्षेत्रात प्रभावी ओळखी असल्याचा दावा केला. पुढे तिने तिजोरी यांची ओळख फौजिया आरसी या तिच्या सहकाऱ्याशी करून दिली. फौजियाने झी नेटवर्ककडून चित्रपटासाठी लेटर ऑफ इंटरेस्ट मिळवून देता येईल, त्यामुळे गुंतवणूकदार आकर्षित होतील, असे सांगितले.
दोन्ही महिलांनी एका आठवड्यात देण्याचे आश्वासन देत पहिल्या हप्त्यापोटी अडीच लाख रुपयांची मागणी केली. त्यांच्या आश्वासनांवर विश्वास ठेवत २१ फेब्रुवारी २०२५ रोजी करार करण्यात आला आणि २२ फेब्रुवारी रोजी तिजोरी यांनी फौजिया आरसीच्या बँक खात्यात अडीच लाख रुपये ऑनलाइन ट्रान्सफर केले. मात्र त्यानंतर बराच कालावधी उलटूनही झी नेटवर्ककडून कोणतेही लेटर ऑफ इंटरेस्ट मिळाले नाही, तसेच रक्कमही परत करण्यात आली नाही.
तक्रारीत पुढे नमूद करण्यात आले आहे की, झी नेटवर्कचा प्रतिनिधी असल्याचा दावा करणाऱ्या ‘जोशी’ नावाच्या व्यक्तीशी तिजोरी यांचा फोनवर संपर्क करून देण्यात आला होता. मात्र झी नेटवर्कच्या वरिष्ठ अधिकाऱ्यांकडून पडताळणी केल्यानंतर अशा नावाचा कोणताही कर्मचारी संस्थेत कार्यरत नसल्याचे स्पष्ट झाले.
आपली फसवणूक झाल्याचे लक्षात येताच दीपक तिजोरी यांनी पोलिसांकडे धाव घेतली. त्यांच्या तक्रारीच्या आधारे १३ जानेवारी २०२६ रोजी बांगूर नगर पोलिसांनी कविता शिबाग कपूर, फौजिया आरसी आणि एका अज्ञात व्यक्तीविरोधात गुन्हा दाखल केला आहे. सध्या आरोपींचा शोध सुरू असून पोलीस या प्रकरणाचा सखोल तपास करीत आहेत.