भुसावळात महिलेकडून गावठी कट्टा जप्त; गुन्हा दाखल
पोलीस महानगर नेटवर्क
जळगाव : जळगाव जिल्ह्यात बेकायदेशीररित्या गावठी कट्टे बाळगण्याच्या घटनांमध्ये वाढ होत असल्याचे चित्र दिसून येत असताना, भुसावळ शहरात पोलिसांनी केलेल्या कारवाईत एका महिलेकडून गावठी कट्टा जप्त करण्यात आला आहे. ही कारवाई बुधवारी भुसावळ शहर पोलिसांनी न्यायालयाबाहेरील सार्वजनिक रस्त्यावर केली.
पोलिसांना मिळालेल्या गुप्त माहितीनुसार, भुसावळ–यावल मार्गावरील न्यायालय परिसरात एक महिला संशयास्पद अवस्थेत उभी असल्याची माहिती मिळाली होती. त्यानुसार पोलिसांनी तातडीने छापा टाकून पंचांसमक्ष तपासणी केली असता संबंधित महिलेकडून गावठी कट्टा आढळून आला.
सुभमा अशोक धामणे (वय ३२, रा. तापीनगर, एमआयडीसी कार्यालयासमोर, प्लॉट क्रमांक ३, भुसावळ) असे आरोपी महिलेचे नाव असून तिच्या ताब्यातील मोटारसायकलचीही झडती घेण्यात आली. तपासादरम्यान सुमारे २० हजार रुपये किमतीचा गावठी कट्टा आणि अंदाजे ६० हजार रुपये किमतीची मोटारसायकल असा एकूण सुमारे ८० हजार रुपयांचा मुद्देमाल जप्त करण्यात आला आहे.
या प्रकरणी महिला पोलिस कॉन्स्टेबल दीपाली रामलखन यादव यांनी दिलेल्या फिर्यादीवरून भुसावळ शहर पोलीस ठाण्यात गुन्हा दाखल करण्यात आला असून, पुढील तपास पोलिस निरीक्षकांच्या मार्गदर्शनाखाली सुरू आहे.