सायबर चोरट्यांचा पुण्यात धुमाकूळ; तिन्ही घटनांतून तब्बल ३८ लाख ५० हजारांच्या फसवणुकीसह गुन्हे दाखल
पोलीस महानगर नेटवर्क
पुणे : सायबर चोरट्यांनी वेगवेगळ्या घटनेत बँक खात्यांना जोडलेले मोबाईल क्रमांक ‘हॅक’ करून व शेअर बाजारातील गुंतवणुकीचे आमिष दाखवून पुण्यातील नागरिकांची मोठ्या प्रमाणावर आर्थिक फसवणूक केल्याचे उघडकीस आले आहे. या तिन्ही प्रकरणांतून एकूण ३८ लाख ५० हजार रुपयांहून अधिक रकमेची फसवणूक झाली असून कोंढवा, मुंढवा आणि पर्वती पोलीस ठाण्यात गुन्हे दाखल करण्यात आले आहेत.
कोंढवा परिसरात राहणाऱ्या ५५ वर्षीय नागरिकाच्या बँक खात्याची गोपनीय माहिती सायबर चोरट्यांनी बळकावली. त्यानंतर खात्यातून २९ लाख ९८ हजार ९७७ रुपये परस्पर लांबविण्यात आले. खात्यातून पैसे गायब झाल्याचे लक्षात येताच त्यांनी कोंढवा पोलीस ठाण्यात तक्रार दाखल केली आहे. या प्रकरणाचा तपास गुन्हे शाखेचे पोलीस निरीक्षक नवनाथ जगताप करत आहेत.
दुसऱ्या घटनेत मुंढवा भागातील एका नागरिकाच्या बँक खात्यातून सायबर चोरट्यांनी आठ लाख ५० हजार रुपये परस्पर काढून घेतल्याचा प्रकार उघडकीस आला आहे. याप्रकरणी संबंधित नागरिकाने मुंढवा पोलीस ठाण्यात फिर्याद दिली असून वरिष्ठ पोलीस निरीक्षक स्मिता वासनिक तपास करत आहेत.
दरम्यान, शेअर बाजारात गुंतवणुकीच्या आमिषाने ४८ वर्षीय नागरिकाची पाच लाख ६८ हजार रुपयांची फसवणूक झाल्याचीही घटना समोर आली आहे. दत्तवाडी भागात राहणाऱ्या या तक्रारदाराच्या मोबाईलवर सायबर चोरट्यांनी गुंतवणुकीचा संदेश पाठवून अधिक परताव्याचे आमिष दाखवले. सुरुवातीला थोडा परतावा देऊन विश्वास संपादन केल्यानंतर चोरट्यांनी मोठी रक्कम गुंतविण्यास भाग पाडले. त्यानंतर ना परतावा ना मूळ रक्कम मिळाल्याने फसवणूक झाल्याचे उघडकीस आले. याप्रकरणी पर्वती पोलीस ठाण्यात गुन्हा दाखल करण्यात आला असून वरिष्ठ पोलीस निरीक्षक नंदकुमार गायकवाड तपास करत आहेत.
सतत वाढत असलेल्या सायबर गुन्ह्यांमुळे नागरिकांमध्ये भीतीचे वातावरण पसरले असून, अनोळखी संदेश, दुवे व गुंतवणुकीच्या आमिषापासून सावध राहण्याचे आवाहन पोलिसांकडून करण्यात येत आहे.