बसमधून महिलांच्या पर्स चोरी करणाऱ्या सराईत जोडप्यास जेरबंद; साडे नऊ लाखांचा मुद्देमाल जप्त
योगेश पांडे / वार्ताहर
अहिल्यानगर – जिल्हा पोलिस दलाने बसमधून महिलांच्या पर्स चोरी करणाऱ्या एका सराईत जोडप्यास जेरबंद केले आहे. या घटनेत धक्कादायक बाब म्हणजे, चोरीच्या गुन्ह्यात पकडलेली आरोपी कोमल काळे ही तब्बल ५० हजारांहून अधिक फॉलोअर्स असलेली रील स्टार आहे.
स्थानिक गुन्हे शाखेचे पोलिस निरीक्षक किरणकुमार कबाडी यांच्या पथकाने गोपनीय माहितीच्या आधारे कोमल काळे हिला पाथर्डी बसस्टँड परिसरातून ताब्यात घेतलं. चौकशीदरम्यान तिने आपला प्रियकर सुजित चौधरी याच्याकडे चोरीचा माल दिल्याचं कबुल केलं. पोलिसांनी तातडीने सुजितला शेवगाव येथून अटक केली.
या ‘बंटी-बबली’ जोडीकडून पोलिसांनी ९,३५,२३० किमतीचा ऐवज जप्त केला आहे. यात ६.५ तोळे सोन्याचे दागिने, दीड लाखांहून अधिक किमतीचा आयफोन १७ प्रो मॅक्स आणि इतर रोख रक्कम आणि मोबाईलचा समावेश आहे. पाथर्डी पोलीस स्टेशनमध्ये भा.न्या.सं. 2023 च्या कलम 303 (2) अंतर्गत गुन्हा दाखल करण्यात आला असून अधिकचा तपास पाथर्डी पोलिस करीत आहेत.