मतदानाला अवघे काही तास, हिंगोलीत कारमध्ये सापडलं घबाड; पोलिसांकडून मोठी रक्कम जप्त, तपास सुरू
योगेश पांडे / वार्ताहर
हिंगोली – राज्यात निवडणुकांची रणधुमाळी सुरू असून २ डिसेंबर रोजी राज्यातील जवळपास अडीचशेपेक्षा जास्त नगरपालिका आणि नगरपंचायतींसाठी मतदान होत आहे. त्यासाठी, प्रचाराची वेळ अवघ्या काही तासांत संपणार असून नेते, कार्यकर्ते उत्साहा आहेत. एकीकडे मतदान प्रक्रियेसाठी प्रशासन सज्ज झाले असून दुसरीकडे कार्यकर्ते मतदारांपर्यंत पोहोचत आहेत. त्याच पार्श्वभूमीवर पोलीस यंत्रणाही सतर्क झाली असून पैसे वाटप, आमिष दाखवून होणाऱ्या इतर वस्तूंच्या वाटपाकडे लक्ष ठेऊन आहे. त्यातच, हिंगोली शहरात एका बॅगमध्ये मोठी रोकड सापडल्याने खळबळ उडाली आहे. १००,२००,५०० अन् ५० रुपयांच्या नोटांचे बंडल पांढऱ्या रंगाच्या बॅगमध्ये आढळून आले आहेत. याप्रकरणी, अधिक तपास सुरू आहे.
हिंगोली शहरांतील शेतकरी भवन परिसरामध्ये हिंगोली पोलिसांच्या पथकाने टाटा नेक्सन कंपनीच्या चार चाकी गाडीमधून एक कोटी रुपयांची रोकड जप्त करण्यात आली आहे. पोलीस आणि निवडणूक विभागाच्या अधिकारी व कर्मचाऱ्यांनी या चार चाकी गाडीची तपासणी केली असता, त्यात बॅगमध्ये मोठी रक्कम आढळून आली. या बॅगमधील संपूर्ण रोकड घेऊन निवडणूक निर्णय अधिकारी त्यांच्या कार्यालयात दाखल झाले आहेत.
दरम्यान, पोलिसांनी जप्त केलेली ही रोकड एका खासगी व्यापाऱ्याची असल्याची माहिती मिळत असून कॅश बाळगण्याबाबत आमच्याकडे परवानगी असल्याचं संबंधित व्यक्तीने म्हटलं आहे. मात्र, निवडणूक विभागाच्या वतीने संबंधित रोकड पडताळणी आणि प्राथमिक चौकशीच्या अनुषंगाने ताब्यात घेण्यात आली असून रोकड मोजली जात आहे. तसेच, कारमधील व्यक्तींकडून संबंधित कागदपत्रांचीही
तपासणी केली जात आहे. या संपूर्ण रोकडची तपासणी व प्राथमिक चौकशी निवडणूक विभागाचे अधिकारी आणि कर्मचारी करत आहेत. मात्र, निवडणूक काळात मतदानाच्या आदल्या दिवशी एवढ्या मोठ्या प्रमाणात रोकड सापडल्याने खळबळ उडाली आहे.