हिल लाईन पोलीस ठाण्याची धडाकेबाज कामगिरी!
बिहार, उत्तर प्रदेश, हरियाणा, दिल्ली, पश्चिम बंगालपर्यंत पोलीस तपास मोहीम; सात गुन्ह्यातील मुलांचा शोध लावण्यात यश
पोलीस महानगर नेटवर्क
ठाणे – हिल लाईन पोलीस ठाण्याने अपहरणाच्या गंभीर गुन्ह्यांमध्ये मोठी कामगिरी केली आहे. कायदेशीर पालकांच्या ताब्यातून झालेल्या अपहरणाच्या अनेक प्रकरणांचा तपास करताना पोलिसांनी बिहार, उत्तर प्रदेश, हरियाणा, दिल्ली आणि पश्चिम बंगालसारख्या राज्यांत जाऊन शोधमोहीम राबवली. या मोहिमेत पोलिसांना तब्बल सात गुन्ह्यांमधील पिडीत मुलांचा शोध घेण्यात यश आले आहे.
हिल लाईन पोलीस ठाण्यातील गुन्हा रजिस्टर क्रमांक १२३/२५, १८५/२३, २२४/२२, ५८९/२५, ३७५/२२, ४४५/२५, ५३२/२५ या अपहरणाच्या गुन्ह्यांचा तपास करण्यासाठी विशेष पथकाची स्थापना करण्यात आली होती. यात पोउपनि/ धुमाळ, पोउपनि/ मोरे, पोहवा/ पवार, पोहवा/ गुरव या अधिकाऱ्यांचा समावेश होता.
वरिष्ठ अधिकाऱ्यांच्या मार्गदर्शनाखाली या पथकाने प्रलंबित गुन्ह्यांचा आढावा घेऊन मागील १५ दिवसांपासून बिहार, उत्तर प्रदेश व पश्चिम बंगालसह विविध राज्यांत तपास सुरू केला. अखेर सात गुन्ह्यांमधील मुलांना त्यांच्या मूळ गावी शोधून काढण्यात पोलिसांना यश आले आहे. उर्वरित प्रकरणांमध्येही तपास सुरू असून इतर बालकांचा शोध घेण्याचे काम युद्धपातळीवर सुरू आहे.
हिल लाईन पोलीस ठाण्याच्या या कारवाईमुळे अपहरण झालेल्या मुलांचे पालक दिलासा अनुभवत आहेत. ही मोहीम पोलिसांच्या तत्परतेचे आणि तपास कौशल्याचे उत्तम उदाहरण ठरली आहे.