माझ्यापत्नीचे अनैतिक संबंध आहेत, तिला आणि त्याच्या प्रियकराला सोडू नका बाबा
निवृत्त पोलीस अधिकाऱ्याच्या मुलाची आत्महत्या; त्याच्या मोबाईलमधूनच आत्महत्येमागचं धक्कादायक कारण समोर
योगेश पांडे / वार्ताहर
मुंबई – मुंबईतील चुनाभट्टी भागात धक्कादायक घटना समोर आली आहे. एका निवृत्त पोलीस अधिकाऱ्याच्या मुलाने आत्महत्या केल्याची खळबळजनक घटना समोर आली आहे. आपलं आयुष्य संवण्याआधी तरुणाने त्याच्या आत्महत्येमागचं कारणही सांगितलं. या प्रकरणी पोलिसांत गुन्हा दाखल करण्यात आला असून पुढील तपास सुरू आहे. १८ एप्रिल २०२५ रोजी चुनाभट्टी इथे राहणाऱ्या तरुणाने राहत्या घरात गळफास घेत आत्महत्या केली. त्यानंतर त्याच्यावर कुटुंबियांकडून यवतमाळमध्ये त्यांच्या गावी जात अंत्यसंस्कारही करण्यात आले. अंत्यसंस्कारांनंतर दोन दिवसांनी तरुणाचे कुटुंबिय पुन्हा त्यांच्या चुनाभट्टी येथील घरी आले. त्यावेळी घरात त्यांना एका कपाटात मुलाचा मोबाईल सापडला. त्या मोबाईलमधूनच मुलाच्या आत्महत्येमागचं धक्कादायक कारण समोर आलं आहे.
मुलाने आत्महत्या करण्याआधी त्याच्या फोनमध्ये एक व्हिडिओ शूट करुन ठेवला होता. त्याच्या अंत्यसंस्कारानंतर यवतमाळहून मुंबईत आलेल्या त्याच्या कुटुंबियांना त्याचा मोबाईल, त्याच्या वडिलांच्या खाती लागला. त्या मोबाईलमध्ये एक व्हिडिओ आढळला आणि फोनमधील व्हिडिओ रिकॉर्डिंगने त्याच्या कुटुंबियांच्या पायाखालची जमिनच सरकली. मोबाईलमध्ये रेकॉर्ड केलेल्या व्हिडिओमधून मुलाने धक्कादायक खुलासा केला आहे. त्याने व्हिडिओ रेकॉर्ड करत म्हटलंय, ‘माझी पत्नी आणि तिच्या प्रियकराला सोडू नका बाबा, माझ्या मुलीची तुम्ही आणि आई मिळून काळजी घ्या’. तसंच तरुणाच्या मोबाईलमध्ये त्याने लिहून ठेवलेल्या सुसाइट नोटचाही फोटो आढळला. त्या नोटमध्ये तरुणाने त्याच्या पत्नीच्या अनैतिक संबंधांबद्दल सांगितलं होतं. पत्नी आणि तिच्या प्रियकराच्या छळाला कंटाळून तरुणाने आयुष्य संपवल्याचं समोर आलं आहे. लेकाच्या मृत्यूनंतर त्याच्या वडिलांना अनेक दिवसांनी मोबाईल मिळाला आणि मुलाच्या आत्महत्येमागचं नेमकं कारण समजलं. मोबाईलमुळे घटना उघडकीस आल्यानंतर त्याच्या वडिलांनी तात्काळ चुनाभट्टी पोलीस स्टेशन गाठलं. पोलिसांत त्यांनी आपल्या मुलाला आत्महत्या करण्यास प्रवृत्त केल्याप्रकरणी तक्रार दाखल केली. या तक्रारीत मुलाची पत्नी आणि तिच्या प्रियकरावर कायदेशीर कारवाईची मागणी केली आहे.