कल्याणच्या योगिधाम परिसरात अज्ञात महिलेची १७ व्या मजल्यावरुन उडी मारुन आत्महत्या
पोलीस महानगर नेटवर्क
कल्याण – येथील योगीधाम परिसरातील प्रमुख गेटेड कॉम्प्लेक्समधील इमारतीच्या १७ व्या मजल्यावरून उडी मारून एका अज्ञात महिलेने आत्महत्या केल्याची माहिती पोलिसांनी दिली. ही महिला लिफ्टने जाताना सीसीटीव्ही कॅमेऱ्यात कैद झाली आहे. या धक्कादायक घटनेने एकच खळबळ उडाली आहे. खडकपाडा पोलिसांच्या प्राथमिक तपासानुसार, सुमारे ३५ वर्षांची ही महिला सोसायटीची रहिवासी नव्हती. तथापि, सोसायटीच्या सीसीटीव्ही कॅमेऱ्यात ती १९ मजली इमारतीतील एका लिफ्टमध्ये प्रवेश करताना कैद झाली होती, जिथे १७ व्या मजल्यावरुन तिने उडी मारून आत्महत्या केल्याची माहिती मिळत आहे.
खडकपाडा पोलीस ठाण्याचे वरिष्ठ पोलीस निरीक्षक डॉ. अमरनाथ वाघमोडे म्हणाले, “मृत महिलेची ओळख पटविण्यासाठी आम्ही स्थानिक सोसायटी गटांशी संपर्क साधत आहोत. तिच्याकडे कोणतेही ओळखपत्र सापडले नाही.” योगिधाम फेडरेशनचे अध्यक्ष नितीन जाधव यांनी माध्यमांशी बोलताना सांगितले की, शनिवारी दुपारी एका महिलेने १७ व्या मजल्यावरून उडी मारली होती. नंतर माहिती घेतली असता, ती अनोळखी महिला होती. ती बाहेरून आली होती. ती येथील रहिवासी नाही, अशी माहिती माध्यमांना देण्यात आली.
या कॉम्प्लेक्समध्ये ही महिला बाहेरून आली होती. ती अगदी शांतपणे लिफ्टमधून १७ व्या मजल्यावर जात असताना सीसीटीव्ही कॅमेरात कैद झाले आहे. त्यानंतर तिने उडी मारून आपलं जीवन संपवलं. या घटनेची माहिती मिळताच पोलिसांनी तपास सुरू केला आहे. खडकपाडा पोलिसांनी घटना स्थळी धाव घेत घटनेची नोंद करत पुढील तपास सुरू केला आहे. या महिलेची ओळख अद्याप पटलेली नसून ही महिला कुठे राहत होती? ती या इमारतीमध्ये का आली? या महिलेने आत्महत्या का केली? याचा तपास पोलीस करत आहेत.