डोंबिवलीत शेअर मार्केट स्कॅम; दामदुप्पट परतावा देण्याच्या नावाखाली कोटींची फसवणूक, रामनगर पोलीस ठाण्यात गुन्हा दाखल
पोलीस महानगर नेटवर्क
डोंबिवली – राज्यात सर्वत्र फसवणूकीचे प्रमाण दिवसेंदिवस वाढत चालले आहे. पोलिसांनी अनेक वेळा आवाहन करून देखील नागरिक आमिषाला बळी पडून स्वताचे आर्थिक नुकसान करून घेत असल्याचे दिसून येत आहे. डोंबिवली रामनगर पोलीस ठाण्याच्या हद्दीत अशीच एक घटना घडली आहे. शेअर बाजारात गुंतवणूक करुन भरघोस परतावा मिळवून देण्याचं आमिष दाखवून कोट्यवधी रुपयांची फसवणूक केल्याची खळबळजनक घटना समोर आली आहे. डोंबिवलीत शेअर मार्केटमध्ये मोठा परतावा देतो म्हणत तब्बल १ कोटी २३ लाख रुपयांची फसवणूक करण्यात आल्याची घटना घडली आहे, या प्रकरणी दोन जणांना ताब्यात घेण्यात आले असून एक फरार आहे.
अनिकेत मुजुमदार, संदेश जोशी आणि संकेत जोशी असे या फसवणूक करणाऱ्या तीन आरोपींची नावे असून ग्रोथअप इंडिया’ आणि ‘अर्थयुक्ती कन्सल्टिंग’ या क्लासेसच्या माध्यमातून आधी विद्यार्थ्यांना शेअर मार्केटमध्ये गुंतवणूक करण्याचे क्लासेस घेतले जायचे आणि त्यानंतर त्यांचे आणि त्यांच्या कुटुंबाचे विश्वास संपादन करून त्यांना शेअर मार्केटमध्ये गुंतवणुकीवर दरमहा १० टक्के परतावा देण्याचे आमिष दाखवून त्यांची फसवणूक करायचे. सध्या या प्रकरणी डोंबिवली रामनगर पोलिसानी ८ ते ९ जणांच्या फिर्यादीवरुन विविध कलमा अंतर्गत गुन्हा दाखल करत दोन आरोपींना ताब्यात घेतले असून एक आरोपी अद्याप फरार आहे. फरार आरोपीचा शोध पोलीस घेत आहेत.